講開煮嘢食，不如介紹吓我個厨房啦！ 日本好多apartment，因為善用地方的關係，煮食的地方都會喺玄關對住的走廊。而我屋企的間隔有啲唔同，玄關兩邊係洗手間同沖涼房，之後就係廳，廳的另一邊就係開放式厨房。 厨房就一眼睇晒，爐頭對面就放雪櫃，雪櫃上面就放咗Bruno Toaster Grill。 厨具方面主要用Le Creuset，因為天氣凍的關係，真係要用啲好厨具先保到温，開頭用提供的簡單厨具，真係未食完餐飯已經凍晒。 相入面係22 cm同18 cm Marmite，22 cm係黑裡，所以我係當佢鑊咁用，一個人啱啱好。18 cm就係白裡，通常用嚟煮麵、煮意粉又或者煮煲仔飯。另外有一個22 cm Buffet白裡，不過好少用。全部Le Creuset都係由香港慢慢螞蟻搬家咁拎過嚟。至於煲湯，第一年嚟就買咗個孖人牌的不銹鋼煲，冬天使用率超高！ 我煮嘢食都係隨心，要求唔高，所以厨房簡簡單單就可以。
