今朝係呢年幾以來，第一次喺落雪的時候跣低，要寫個post好好記低！ 大家可能會以為上幾個星期大雪，又負氣溫，會寸步難行。其實今個星期徘徊零度上下，冰雪交融的情況下先最難行。今朝大約0至2度，地面積雪唔多，反而全條路都係冰，仲要d冰開始溶，有薄薄一層水喺面，真係跣到一個點。今朝行到大半都係邊跣邊行，本身著住對雪靴都終於跣低，幸好行咗咁耐有經驗，重心要低加細步行，只係輕輕坐低左，即刻起得返身無受傷，好好彩。仲記得第一晚跌親的感覺，今次再跌，好似衝破左呢年幾的心理障礙呢！ 返到工同同事講行返工的時候跣低左，原來坐我附近差不多有一半同事今朝都跣低左，大家仲模擬返事發經過，真係笑到喊。連久經訓練的本地人都跣低，可想而知今朝有幾跣！夜晚放工已經天黑，有今朝的經驗，更加要小心行。最後，平日唔駛10分鐘的路程，今日用左20分鐘，呢d時間，一定要慢慢行，安全第一！ 下個星期開始應該好多人會嚟北海道玩，出入室內外，尤其係上年紀的，都係加定雪抓穩陣。無一對雪鞋可以包唔跣，最重要慢行，重心擺低，整個腳掌落地，安全要緊。好多文章都話過馬路要小心，路面結冰好危險。除此之外，見到綠燈唔好即刻行，肯定車停左先好行。揸車的同事講，天氣差的時候，就算落左雪軚，70%時間都係溜緊冰，又或者轉彎飄左過隔離線。 雪中生活，真係每一刻都係做緊Problem Solving。到呢一刻我都係享受的，南方人仍然好努力適應北方生活呢！
