上星期開始，氣溫全面負數，除左星期一至五要返工，星期六同日都係留喺屋企最好。大家都問我，成個weekend留喺屋企會不會好悶，其實一個人住真係大把家務做，再整下野食，好快又兩日。 呢個weekend試整左餃子同埋叉燒飯，兩樣都係第一次整。超市有餃子皮買，加埋免治豬肉同菜就搞掂。第一次包算係唔錯，煮完都無散，只係豬肉太瘦，食落有d鞋，下次要買肥d再研究下。天氣凍，要食好多先飽，餃子點醋、豉油同豆板醬，話咁快就食完兩打。 臨瞓就用叉燒醬醃定豬腩肉擺喺雪櫃，今日就可以整。首先洗米，浸落米之後就將醃好的肉放入Bruno Toaster Grill，先用上下火焗15分鐘。焗緊的時候就開始煮飯，我用Le Creuset 18cm Marmite煮，一杯米一杯水的份量，滾起就蓋好蓋，細火煮多8分鐘。到叉燒焗夠15分鐘，就反轉另一面用上火再焗10分鐘，最後再反轉落蜜糖焗多3分鐘。飯夠鐘就熄火，唔好開蓋住，等叉燒焗好就放上飯面，淋返少少喺焗盤的叉燒汁喺面就完成。成個過程大約半個鐘到，豬腩肉的油都喺焗的時候焗晒出嚟，所以食落唔算好肥。今次係我喺札幌年幾以來第一次煮飯，之前一路都係食麵、意粉或者烏冬呢！ 做下家務，煮下野食，一個weekend好快就過⋯⋯其實悶唔悶係自己點睇，而家的我好enjoy呢種悠閒時光！
