在寫台北遊記前,我想先分享一下我在西門町遇到的騙案。 三月尾一個人到台北旅行時,首先到訪的就是在旅店附近的西門町。 剛放下行李,吃過午餐,在西門町閒逛等check in 時,走到漢中街臨近捷運6號出囗附近,突然有個打扮mk 的肥仔(15/16歲左右)行過嚟好客氣咁同我打招呼。 肥仔:大哥,你好你好!請問你是不是本地人? 當時我啱啱到台北警覺性唔高,不以為然,話左唔係,跟住佢就問我係邊度人,開頭我只係話係外地來的唔想答,佢繼續問邊度,我就同佢講左香港。 跟著佢就好高興咁同我握手並用半咸淡既廣東話話自己係中學生(聽左好耐先明白)......扮客氣,扮熟咁同我傾左幾句後,佢突然講左句:你可以和我說一聲加油嗎? 雖然唔知佢做乜,但只係講一句加油,應該冇野掛? 當我向肥仔講左句加油,點知呢下就即刻出事。 Credit: 三立新聞網 講完加油,佢就秒速塞左件野比我,果時個腦都已經好亂,都望唔透佢想點。 定神一看,係一個手機袋。塞完件野比我,佢即係同我講多謝,語氣(好似)好誠懇咁話佢地參加梗一個學校比賽,件野就係佢地比賽既貨。 當我以為冇乜野準備起行,佢就話大哥請不要介意呀,因為佢地係學生比賽,想我誠意幫助佢地補番小小成本,幾多都得,比錢呢樣係之前冇講過既。 好喇,佢塞左比我,又話比幾多都得,港幣都得,咁算啦比少少佢地就算。 當我想比散紙,佢話唔收,同時話大哥你不要生氣喔,佢唔收散紙係收至少一百,又係之前冇講。 當我想比一百打發佢走,佢先show 佢件貨寫住台幣300叫我比,成個過程不停重覆一句不要生氣,話幫幫忙,話係明碼實價標示的,如果佢地賣唔出去返到去會比學長罵的。 因為一直抬價,同埋真係唔想比七十幾八十蚊港紙買一件自己根本唔想買既野,於是開始同佢理論,但佢一直重覆叫我不要生氣(好似好委屈咁,明明係佢呃梗我......),話賣唔到會比人鬧...... 由於僵持不下,附近開始有幾個肥仔既同黨走過嚟幫肥仔,感覺上就是來圍我一個人......但我始終唔想比,班人同肥仔講左幾句後,肥仔開始轉策略,說給我兩件手機袋,可以賣平啲比我,TWD500 比我。喂!我都唔想要!做乜仲要我比多啲錢要多件唔想要既野! 我意識到,如果自己唔比唔知班集團會點,但真係唔想比咁多,一直就同佢講TWD200 一件得唔得,因為我真係窮遊冇錢......拗左好耐,肥仔開始唔耐煩,結果想盡快搵第二個老細,面露不悅咁應承收TWD200放我走...... Credit: 台灣蘋果動新聞 後來我再次經過漢中街,除左見到肥仔,亦先後有一個女仔同男仔(初中年紀)分別叫我同佢講一聲加油同問我邊度嚟,賴過一次野之後已經直行直過,但依然覺得好煩厭......除左西門町,之後第三晚喺台北車站亦都遇番同一個女仔在sell客...... 據我觀察發現,他們類似集團式的街頭騙案,往往會找一個人或兩個人的遊人下手,因為沒有照應,容易施加壓力得手......網上發現原來高雄也有...... 數年前曾聽聞過愛心筆事件,後來和朋友談起,才發現兩年前他們也曾在西門町遇過,當時的版本是台中中學生為了旅費而賣自己設計的筆,朋友也是無奈下付了錢買了兩枝......往台北的遊客要小心加油黨的這一把戲啊! References: 西門町捷運蠻橫學生幫 攔人強迫推銷包包「恐觸強制罪」 「幫我加油」強迫銷售 橫行西門町