東京違泊有幾次自駕經驗 但抄牌是第一次..話說今次東京因帶住小豬旅行 想行程舒服 又唔需要深入陣地（新宿/原宿/池袋）shopping 自駕成為我地既首選住宿選了淺草及橫濱 夜歸也沒有醉酒佬（你懂的）講番案發當日（笑）係由淺草出發去橫濱 近近地泊喺錶位食過早餐再去雷門行下 殊不知就出事啦！日本既咪錶好勁 你一停車喺果個位置就開始計時我地停左車左攪右攪過左15分鐘先入錶（帶小孩就是不能兩袖清風嘛）丫~個錶只可以入1個鐘添 我見前後既錶位都有閃燈（代表過時）應該冇咁岩啩，入完快步去開餐，嘆完個早餐慢慢行去再入錶望一望水撥冇事（港豬） e..點解貼多左張行車證比我地既，我想問我佬恭諗一諗 唔係咁邪嘛！超時10分鐘！如果香港我落車先入錶計 我55分就番到嚟啦！點解日本咁絕情車停低就計呢？（香港技術冇咁先進所以寛鬆姐）呆左幾秒 即時上車 睇下張黃色“行車證”可以點攪(港豬既想法-逃離現場番左香港關仁忍事 錯!)呢個時候見到個巡警問問應該點攪 但真係...簡單英文都溝通唔到無助之際收到租車公司個e mail話我地違泊要去交罰款拎收據比佢 否則還車當日比30000連埋手續費佢話任何一間警署都可以交罰款 我地就順路睇地圖經過就去埋 點知....去到其中一間警署 個識國語既警員話要去番發票警局先可以繳交 即係淺草警署呢刻人都癲 仲有半個鐘車程就到橫濱 又就快天黑 真係嬲啊~~~~我地唯有直去橫濱check in第二日先算(有30日繳款期限)旅程最後一日我地抱住受死既心情去番淺草(畢竟係15000同30000既分別嘛!)攪左一個鐘佬恭終於無罪(免費)釋放原來初犯只要寫份協議書(改過書)就可以寬免(笑)不過都係提提大家 雖然東京泊車場起錶1500但總好過泊唔熟識既錶位最後比人抄牌 浪費時間又影響旅遊心情我地當上左寶貴一課 以後唔會懶搵停車場同識泊錶位啦 hehe~~(如有任何資料不正確請糾正) 後續 睇左好幾個分享都冇提到初犯寫悔改書既劇情而且亦唔需要去番抄牌既警署我估計我地既情況比較特別一係抄牌果張紙有分別一係警署人員冇辦法同老大溝通叫佢去交罰款(但我地去第一間警署已經叫我地去番出告票果間亦冇叫我地去銀行交罰款)以上的確係我地經歷 但點解剩係寫份野就走得 真係無從稽考2020年更新
