數數手指,原來今個星期日就係父親節,唔係爸爸提起話要食飯,都唔係好記得父親節係幾時@。@唔知你地又會唔會係呢啲節日,帶埋另一半同爸爸食飯?或者趁機見下家長呢? 今次想同大家分享小小見家長小TIPS,留返個好印象比另一半屋企人! 1)FIRST IMPRESSION 第一次見面,衣著當然唔可以失禮,但又唔洗著到去飲咁嘅,最緊要自己舒服!女仔最好收起短褲、短裙,著返條簡單ONEPIECE就斯文大方啦;男仔就唔好拖鞋、波衫啦,萬一著左女朋友爸爸唔鍾意果隊波就無謂啦! 2)禮多人不怪 係就係老土D,不過禮貌真係好重要!小小見面禮、食飯要叫人就一定架啦,仲要留意食飯時嘅禮貌,例如:唔可以飛象過河、等長輩起筷先好起筷等等,最重要嘅係.... 唔好做低頭族!!!!!!! 雖然自己平時都鍾意一路食飯一路玩電話,但今次就要收埋啦!可能你會覺得第一次食飯有少少怕醜或尷尬,想玩下電話分散下注意力,但其實咁做係好冇禮貌架!不妨同另一半家長傾下偈,又可以比佢地了解你多D啦! 3)細心 食飯時多留意另一半,例如主動夾餸比佢,遞紙巾等,呢D行為可能你會覺得造作,但人地爸爸媽媽就係睇呢D,睇下你對自己個仔女好唔好,細唔細心,點都要扮下野做下架,可能你另一半仲會對你另眼相看添~ 4)安排好食飯地點 去邊度食飯成日都令人好苦惱,想食好味嘅餐廳,但又怕多人要等;唔想等,又怕味道唔好,所以如果搵到間好嘅餐廳食飯就一定加分啦! 今次推介呢間中式私房菜,有傳統菜式又有新派菜,岩哂見家長啦! 西式餐廳通常都會由沙律前菜食起,但估唔到中菜都有,賣相仲好靚添!有懷舊金錢雞、野菜沙律、焦糖鴛鴦薯,建議食左沙律先,再食金錢雞,最後就係焦糖薯條,脆卜卜好好咬。 唔知大家又知唔知金錢雞係咩呢?原來以前香港經濟唔係咁好時,雞係有錢人先食到嘅食物,窮人就用肥豬肉、雞肝串埋一齊燒,扮雞。雖然個人覺得唔太似雞,不過味道好甘香,仲好味過雞呀!配埋沙律一齊食,絕對冇肥同油淋淋嘅感覺 *0* 另一推介就係竹笙燕窩卷配南瓜汁,大廚係每隻碟都畫左唔同花,好有心機!因為燕窩本身冇咩味,用竹笙包住燕窩,配埋濃濃嘅南瓜汁,咬落好爽,味道又清新,相信係女士們嘅最愛,一定可以奪得未來奶奶/未來外母嘅歡心啦~ 所謂不時不食,夏天當然要食瓜果類,呢個用上湯浸煮的勝瓜好厚肉,仲食到疏菜獨有嘅甜味,仲有個好好聽嘅名--白玉翡翠 >0< 食完主菜就當然要食甜品啦!強烈推介脆皮流沙奶黃包!!!平時飲茶都好鍾意食流沙包,但係有D流沙包嘅只係流「油」唔係流沙,真係見到都唔想食呀!! 不過呢間就唔同啦,皮好脆,係偏乾身,唔似平時食波羅包嘅酥皮,感覺上冇咁肥~!而個流沙真係好正,食完唔會渴喉,加上細細個,食多兩個都冇問題啦!順帶一提,呢間私房菜有點心外賣舖,可以試試!! 食完中式甜品,估唔到仲有西式!呢SET甜品有熱情果凍杯,酸酸地,好岩食完飯食;又有芒果蛋糕,好鬆軟又唔會太甜;仲有自家制果仁朱古力,我只可以話:好幸福喔~! -------------------------------------------------------------------------------------------------- 價錢:♥ ♥ ♥ 上鏡度:♥ ♥ ♥ ♥ ♥ 浪漫度:♥ ♥ ♥ 餐廳資料:東海私房壽宴 East Ocean Private Kitchen 地址:美孚百老匯街69-119號美孚新邨四期美孚廣場3樓 電話:2370 9618 (叫得做私房菜,當然要訂位啦!) [一like一動力]鍾意我地嘅請多多支持Facebook專頁!歡迎交流*v*