各位朋友晚上好~年三十晚，食左團年飯未呢？小編前幾日同樹仁一班朋友去左元朗天后古廟嘅一間食盆菜嘅地方食飯。入左元朗要再轉小巴入去，真係可以話係一間隱世小店嚟。 平時會覺得盆菜係將所有肉放唒入個盆，然後全部肉都係嗰隻味，講真真係無乜好感。不過！唔知係小編放工肚餓咩都覺得好食，定唔知佢真係咁好食，當我放舊大蝦入口嗰陣，發覺原來我之前嘅諗法原來錯唒⊙_⊙ 干煎大蝦醬汁濃，咬落啲蝦肉鮮甜，啜埋蝦頭啲膏真係無得彈。除左蝦，豉油雞同燒鴨都好唔錯，多汁又嫩滑，啱唒啖啖肉嘅你！最後就係芋頭喇。芋頭放喺最底，索唒盆菜啲汁，口感鬆軟，芋香又足，但勁快俾人食唒囉T_T 嗰度位置比較偏僻，所以年廿九晚都無乜人食，大學生有時玩得比較癲同大聲，咁就啱唒啦~周圍有石牆，仲有白貓行嚟行去，加上旁邊有天后古廟，感覺傳統又寫意^_^係一班人聚會好地方！ 嚟開元朗，食完就緊係要去B仔涼粉啦。去到已經坐滿咁濟，個伙記都好好人咁特登開左五張枱俾我地^_^講真，去B仔小編最愛堅係雞翼尖，辣辣地好頂癮。有時人就係咁犯賤，明知呢樣嘢膽固醇超高又肥，但都係忍唔住食(-_-) zzzB仔招牌涼粉就不用多介紹啦~ 想知道宜家大學生鍾意食乜，自己學校有咩食，其他大學又有咩食？就記得緊貼我地嘅專頁喇！
