今年與往年不一樣，賣的是全日票，真正由朝玩到晚。同大多數打工仔一樣，姐都係6天工作的，所以都係選擇左星期日去。 日頭的海洋公園是場戰爭！有好多五顏六色帽子的旅行團團友，唔知點解佢地排隊係一定要緊貼前面個屎忽。今次去海洋公園玩有經歷過被打尖亦都有俾人痴住個屎忽黎排隊，入夜之後佢地離開之後成個公園舒服勁多。 日頭主要去睇下小動物，欣賞下啲海底生物，海洋公園的<<海洋奇觀>>永遠都係咁靚咁好睇，不過今日去就覺得有少少嘈雜，影響氣氛 可能係人大左，海洋劇場好似無以前咁好睇 海洋劇場既水族館都有Halloween的裝飾 好！入正題！哈囉喂先係此行的主角！星號的係我今次有玩的鬼屋。精彩的永遠在後頭，在此提醒所有入場人仕記得預留時間欣賞誠意Show---<<冥府有囍>>！ 第一個玩的係山下日間限定的<<妖怪大捕手>>，同樣位置夜晚會化身成為<<血祭地獄門>> <<妖怪大捕手>>是以AR為主軸，透過手機配合弓箭射擊手機屏幕上的鬼怪獲取分數的遊戲。只能夠話隻弓箭真係非常之難控制，我係只能夠篤個手機黎射鬼，亦無乜特效可言。成個過真係有啲悶，建議大家都係節省時間！SKIP！ 然後繼續要玩的是<<森魔屠園>>，排左大約45分鐘。入面的演員係我今次去的鬼屋最多的一間，同埋可能係因為佢5點後先開，而我地又比較早去玩，所以入面的演員感覺上都比較有活力，係可以俾隻同一隻鬼combo嚇到幾次，同埋有種行極唔完的感覺。LIKE ！ 跟住就玩埋附近的<<屍營醫院>>，佢個牌就寫話等候時間大約係45分鐘，但實際應該排左70分鐘至90分鐘左右啦，隊伍隔離有個舞台，排到世界末日的期間會有鬼醫院show睇下，個安排係幾巧妙既，只係中途3次show，我都無一次個位係睇到既。仲值得讚的係佢個show唔係次次一樣嫁！ 排到入鬼屋之後，5人一組，工作人員會派一個電筒，話個電筒會探測到靈體既時候會閃閃下，佢仲指定要我渣電筒行頭，其實老實講，行到入去係夠光睇到路既，所以基本上都無乜點理過個電筒，個電筒仲成日照到暗角啲鬼。整體黎講，不過不失啦，係真係排得太耐啦。 由於屍營醫院真係排得太耐，而我又真係好想落山睇<<冥府有囍>>原本想玩既VR越礦飛車無玩到，就去左玩等15分鐘就有得玩既<<血腥馬戲團>>，排隊中途馬戲團既團長同團員都有出黎大家計同影相，15分鐘好快過，馬戲團都幾好睇，擺設無醫院咁花巧但燈光就明顥花過心機啦。後段驚嚇位真心多。收貨！ 之後就去睇<<冥府有囍>>，我覺得個Show真係有誠意有水準又貼地又本土，真係好有驚喜，睇得好投入又興奮。正！ 睇完個SHOW已經係11點鐘，都夠鐘收皮嫁啦，咁就急急腳去食個宵夜然後......第二朝準時返工！
