作為一位單眼皮女生，夢想就是擁有一雙有神的大眼睛，雖然單眼皮女生仍有其獨有的美，但不時仍想動刀，最終於上年(2021年)正式進行手術，事隔一年與大家分享心得。Q1. 前期諮詢過程2021年5月13日預訂諮詢，15日首次諮詢，17日見醫生，20日做手術，約一個星期完成。Q2. 手術種類纖維線吊線 ，簡單而言即是於眼皮開五個洞然後穿尼龍繩在內，尼龍繩不會分解，但可能會甩，所以並不是永久的，醫生指以我狀況可以維持8至10年。Q3. 手術過程第一次諮詢：見consultant填資料，之後約時間見醫生及預訂手術時間，主要是付款。第一次見醫生：填健康資料，有無長期病患，之後會入間房影張相，等多陣就見醫生，醫生都係基本問下你啲嘢，之後拎鐵線幫你試幾個高度（無話幾多mm，隨心的）然後睇情況建議下你抽脂開眼頭咁，過程應該得幾分鐘，之後就走得等做手術。手術前一日會提你準備咩：（以下供參考）⚠手術前注意事項⚠有沒有任何長期病患？服用藥物包括西藥、中藥、成藥及保健產品？任何藥物敏感？1. 手術前可進食 （避免飲用咖啡或者茶）如需空肚姑娘會提早告知！！2. 手術當天切勿配帶 金屬首飾耳環及隱形眼鏡3. 手術當天面上 不可以塗任何護膚產品，防曬以及化妝品4. 手術當天亦可攜帶太陽眼鏡（手術後對光十分敏感，如無太陽眼鏡眼晴會好辛苦）5. 手術前可先購買 紗布、棉花棒、蒸餾水及冰袋，用作手術後清潔之用6. 手術當天 請勿種植睫毛及gel甲手術當日：可以有人陪但佢唔可以入休息室/手術室，嗰度有個waiting area比佢坐/叫佢落去行下食下嘢，大概一個鐘返嚟接你。（我本身10點手術最後等醫生搞到差唔多11點幾先做，冰敷埋大概12點走）登記完基本上佢就要走無得陪，之後會有姑娘帶你去休息室（每個人獨立一間）放低嘢換衫洗面（咩都唔可以搽都唔可以有油），簽文件⬇️換好簽好就去見醫生，又係問基本嘢同模擬多次條線，之後就真係用marker畫線⬇️影相⬇️返房等做手術⬇️護士拍門，自己行入手術室坐上床，問你咩名知唔知做咩手術，之後食藥（一粒止痛一粒抗生素）然後瞓低夾手指check心跳+長期箍住血壓計（手術過程會自動keep住度)⬇️護士會搵舊嘢lock住大髀，開始鋪嘢消毒，最後得返隻眼露出嚟，之後佢會開定手術燈叫你唔好開眼習慣下一間啲燈光⬇️醫生入嚟問名問知唔知嚟做咩，每隻眼滴咗兩滴眼藥水（眼麻藥好似係）之後我都未嚟得切反應佢已經插咗第一枝麻醉針落嚟，（因為好似如果打針嗰下無維持正常呼吸同太緊張就會瘀，我嗰下嚇親無抖氣所以有隻眼好瘀，我做手術之前仲一直提自己要冷靜保持呼吸，點知佢殺我一個措手不及）之後就打第二針同第三針（注意係每隻眼3針，共6針），每邊打第三針之前會zip塊嘢落眼皮同眼球中間保護隻眼，其實第一同第二針都ok，但第三針好似喺眼底打入眼球咁真係好痛（對平時整眉整眼線etc都唔覺得痛/出面啲人多數話我幾忍得痛嘅人嚟講第三針真係痛）然後打完左邊醫生就打右邊（因為今次知咩事所以冷靜我隻右眼就無瘀），跟手佢用力壓一壓隻眼，就成功麻醉了，醫生問痛唔痛，有冇比尖嘢拮到痛嘅感覺，嗰下我淨係feel到有嘢篤但已經唔痛所以就即刻開始。（btw 麻醉藥個個反應唔同，上網睇到啲人真係唔夠縫到好痛苦，以我經驗麻醉之後係真係一啲都唔痛，所以如果真係feel到有啲痛，我諗真係要即刻出聲唔好忍）⬇️成個過程佢會zip塊嘢喺眼皮同眼球中間之後淨係feel到有個夾夾眼皮，有針有線穿過（係exactly縫衫嗰隻feel，我係feel到有條線喺我眼皮下面經過）同埋佢喺我第1，3，5個窿度抽啲脂肪出嚟（唔洗額外開傷口）都係唔痛，純粹feel到拉扯得勁啲，同埋間唔中塊板會壓到隻眼嘅感覺，做完左眼就右眼，一邊5-10分鐘度，其實真係成程手術縫仲要抽埋脂唔過20分鐘⬇️搞掂之後醫生會叫你開一開眼，但我腫到以為自己開唔到眼，跟手佢話ok同手術結束就會走，護士就幫你除返啲嘢扶你起身去休息室度抖，成個過程都無痛嘅感覺淨係做完勁腫⬇️護士會幫你搽一搽藥膏之後比舊嘢你冰敷，淨係記得佢叫我唔好拎走舊冰同瞓落床抖，個人仲有呆滯但偷偷地照鏡同影相紀錄下，我記得我一拎起塊鏡望到隻眼第一反應係大笑，隻眼勁腫又瘀又出緊血但唔知點解覺得好搞笑，之後敷半個鐘到姑娘就會敲門入嚟叫你換衫拎齊嘢⬇️搞掂會入間房影多次相，之後比藥（止痛藥，消炎，抗生素，藥膏，眼藥水）最後再約埋7日後覆診時間就ok搵返人接你就走得（自己走都得） 希望以上資訊可以幫到大家，如有問題可以隨時電郵我(tszyinch@gmail.com) ** 以上分享只屬個人分享** ** 本網誌內所有文章和圖片均屬本人所有。圖文如欲轉載，請先聯絡 tszyinch@gmail.com ! 如發現未經授權使用，本人將保留一切追究權利 ! **
