自從被女神K 退伍後，若有所失，有種「活著受罪但是又離不開」的感覺。放lunch的時候，一路行一路諗「其實你待我算不算愛」之際，見到間新開的餐廳，好多甜品display出嚟。人地話失戀食甜品好喎 (其實連失戀都談唔上)，咪捉左個朋友入去食個晏囉。 我朋友即刻制止我，話：「呢間唔啱你架死肥仔。」我正想衝口而出：「又咩唔啱呀？食餐晏都阿之阿左呀？」再跟手指住個餐牌，有我鐘意食的肉醬意粉，「我鐘意的女神都有男神啦，係咪我食鐘意的肉醬意粉都唔得呀？」朋友話：「你係咪做兵做到傻咗呀？呢間係齋鋪嚟架﹗」 其實我一向無肉不歡，但講真呢輪食龍肉都無味，清心寡欲啲啦。入到去坐低睇餐牌，其實一啲都唔「寡」，肉醬意粉、薄餅、熱狗........原來係一間西式素食餐廳。order咗兩個午餐set，先嚟個西湯 – 蘭度豆忌廉湯。 足料又夠味，不過我覺得可以再竭(傑)啲啲，可能我concept忌廉湯係竭啲。當然我選擇的主食係肉醬意粉。 每次食齋，都會有個話題一定會講，就係「齋版似唔似原版」。今次都唔例外，呢個肉醬意粉，口感同味道相似度80%左右，可能我鐘意啖啖肉，但「肉」的部份比較單薄，如果多啲「肉」，我可以比埋果20%﹗而我朋友就選擇左「脆肉瓜卷肉丁飯」。 賣相一流﹗我朋友話：「好似」，好似咩呀大佬？講清楚啲啦﹗「好似肉咁，啲黑椒汁好好味」，最後成碟刮晒，應該好味，望落去啖啖肉，我有啲後悔唔叫呢個。餐茶方面，我見到餐牌上我見到個叫「黑麥汁」，好奇心好鬼重的我即時order。 以為係鮮搾的清新飲料，原來係罐裝飲品。點樣形容呢？有點點似走晒氣的「沙示」，當然有陣麥味啦，甜甜地幾特別。 食晒飯，我就行出去睇下有咩甜品選擇。 我選擇咗芝士蛋糕同埋奶凍。 先講芝士蛋糕，第一啖入口真係唔似，但慢慢會覺得好似﹗我認為無論口感同味道都有90%相似。奶凍方面，用左椰漿同朱古力漿加強滑的口感，味道都ok，有70%，不過都唔係太滑..........咪住先，芝士、蛋都唔屬於齋，咁究竟我食緊啲乜？ 原來芝士蛋糕，係用准山+腰果打成的，算是健康的食材。至於奶凍，店長說是秘方不能透露 >_< 離開餐廳，勾起我前塵往事。其實每次都係做兵，都係咁單向，以為一味對佢好，關心佢，博得紅顏一笑，就以為有機會。做兵，同食素一樣，食落去以為係肉，其實係菜；以為人地比機會你，其實只係自欺欺人。唉，who know that feel? 註1：雖然我一路係講「齋」，其實呢間係「素食餐廳」，係有分別的。 註2：以上素食，並非流行的齋店食物，一啲都唔油膩，一啲都唔重口味。 註3：入去食，啱晒啲所謂「齋心唔齋口」的人 ^_^ 地址：荃灣大河道77-89號寶成樓地下9號鋪 (台風附近) https://www.facebook.com/greenfreshvegan 營業時間：10:00 - 22:00 文： 多羅羅兵長 荃灣民生動力的迷途小羔羊 組織成立的目的，是致力成為荃灣街坊的「真鄰舍」 https://www.facebook.com/tsuenwandp
