有日，女神降臨荃灣，適逢女神誕，我等凡夫俗子隨即狗衝慶生。及後女神希望以甜品作結，普通的貢品如何能滿足到？要令女神留下美好回憶，其實唔難。 豆福，位於旺中帶靜的大陂坊 (川龍街、沙咀道、眾安街交界) 主打正宗新加坡熱賣的豆花布丁。 有4款味道：「原味」、「芝麻」、「杏仁」、「奶茶」、以及有緣人版「玫瑰」 (每個隨機限定一兩天) 二話不說，「2份玫瑰呀唔該」，我心諗：「機會嚟啦飛雲」。 當然，這些機會不是屬於我的........(當天沒有玫瑰味) 女神選擇了奶茶，「技術上」我唯有選擇奶茶too，要制造一種「大家口味一樣」的錯覺﹗ 入口即溶的口感，以及透心涼的溫度，完全滿足到女神的舌頭﹗ 原來豆花布丁完全無落石膏粉，所以先有呢個效果。而且奶茶味獨特，並非香港的奶茶味道，原因係新加坡的奶茶茶底較單一，味道很有麥的味道。想食甜啲，可以添加自家制的班蘭糖水。 觀察到女神心情極佳，正打算相約去逛街之際，女神淡然地說了一句：「我約咗個朋友，轉頭就到。」我擰轉頭，即刻到咗。係一個長頭髮貌似任賢齊的男子，講左聲拜拜，一手就拖走咗我女神，我唱「對面的女孩看過來」都無用，頭也不回咁離開咗。 老板Yvonne見我唸唸有詞咁啍著「傷心太平洋」，她跟我說「不是你的，就別再勉強」。仲請我食個芝麻味，叫我冷靜一吓。佢話：「一下子就挑戰女神級，很困難呢﹗請你食芝麻味，個個入嚟都係揀芝麻味先，因為係容易的口味。你都係，揀啲易入手的女仔啦﹗」 透心涼的豆花布丁，加上熱情的老板，令我重新振作起嚟﹗ 大家嚟到豆福，一定感受到呢度既冷靜與熱情﹗ 以後有人問你，荃灣食甜品有咩好介紹，唔洗再答路德圍啦。 荃灣大陂方15號泰華大廈3號地鋪 https://www.facebook.com/dohfu 營業時間：14:00 - 0:00 文： 多羅羅兵長 荃灣民生動力的迷途小羔羊 組織成立的目的，是致力成為荃灣街坊的「真鄰舍」 https://www.facebook.com/tsuenwandp
