去過香港機場，一定知道 CX 最出名就係貴賓室。 一個地區五間分店，就連OK,7-11都未必有佢咁強勁。 CX 真係有名你叫’’惡晒’’，以前都話獨霸航線市場，依家連貴賓室都唔放過，搭完無人駕駛列車，上返扶手電梯就即刻雞乸咁大隻字’’逸連堂’’歡迎你，初臨香港既旅客會唔會以為有間food court叫The Bridge咁得意呢？唉，簡直就係免費廣告牌。 門口先有惡晒大logo壓場坐鎮，落一層扶手電梯後，正式進入逸連堂範圍。 逸連堂分左右兩邊，官方美其名稱其為’’北翼南翼’’，但其實入面既服務員都無咁得閒同你文縐縐，只稱’’左右兩邊’’了當。 北…右手邊既貴賓室用色比較柔和，家俬都似返惡晒其他貴賓室。 用餐區基本上變化不大，飯堂格局，豪華佈置。 左手邊格局以冷色為主，但裝修大致與北翼貴賓室大同小異，兩者可以話成一個對稱。服務員話右手邊多野食D，但個人喜好南翼多D。 淋浴間間隔有作出改善，至少唔會好似The Wing漏到浴室門口都就快水浸。 同時私人馬桶亦係亮點之一，可隨意使用，不過假如上一手貴賓係入面黎個大解放的話，香氣四溢之下，下一手顧客就難免受罪。 食物方面，個人認為剛好恰到所需，不過同行既友人就認為選擇嚴重稀少，早上得白粥腸粉菜肉餃，而菜肉餃仲要蒸過龍搞到成個餃皮硬晒，話有待改善咁喎。 總括而言，逸連堂雖然位置隔涉，但勝在有寧靜。可惜都係有同樣問題，室內設計過度’’開揚’’，人多的話又變左另一個大家樂飯堂，位都唔夠你坐。所以各位都係以閘口位置為主導，無謂因為新屎坑而攀山涉水，到時白行一趟就真係欲哭無淚。
