去到關島已經早上 5 點幾,個天都係啱啱先光,晨早流流又無咩好做,老娘同友人唔知邊個諗咗條屎橋出嚟〔諗番好似係老娘我提出〕……話由機場行去酒店喎!喺機場都望到酒店,應該唔係好遠啫,蝦蝦……蝦… 其他人實係覺得我哋食飽飯無屎痾!話說老娘今次入住嘅係位於塔穆寧〔Tamuning〕嘅 Sheraton Laguna Guam Resort ,距離機場 3.7 km,啫係啱啱好整條英皇道〔天后 - 太古〕嘅距離。如果坐車嘅話,真係轉個彎就到。但行嘅話,老娘都行咗成粒鐘先到酒店大堂。 沿途都有唔少奇異目光望著我哋,特別係步出機場範圍個一小段路。有 3-4 架車停落嚟問我哋有冇嘢需要幫手,連跑緊步嘅女人都對住老娘笑〔可能係恥笑緊我哋:哈哈,2 個傻仔!〕沿途憑感覺行,連 Google 大神都冇問〔問咩呀,電話卡都冇張,不過行去酒店嘅路算簡單嘅〕。 沿途有咩發生?無喎!咪就係不停行、行、行。不過一世人流流長,咩都要試下嘅,有幾何可以由機場行出市區〔係市區,唔係行去東涌!〕。喺老娘踏足關島不足 2 小時,喺太陽未出曬嚟之前,老娘已經完成一樣壯舉〔對於老娘嚟講至少算係〕,重點係老娘慳咗15 USD~ p.s. 其實今次關島之旅,老娘係自駕遊的……頂 安東尼奧.汪帕特國際機場 Antonio B. Won Pat International Airport有冇戰機? 大家都好好奇點解去關島嘅飛機都係凌晨出發,有人就話因為日頭關島機場會用作軍事用途,所以飛機都盡量安排係夜間升降。老娘第一次聽嗰時真係半信半疑,係真唔係呀!於是,老娘又發揮求真的精神……〔八卦就八卦啦〕 ⅰ)其實上 Google Map 就會見到關島係有 2 個機場。一個係中部商用機場,啫係安東尼奧.汪帕特國際機場,另一個就喺北部安德森空軍基地,嗰個先係軍用機場,既然都有個軍用機場,又駛咩用關島國際機場? ⅱ)另外,上 www.guamairport.com 睇航班資訊就會見到,其實日間都有飛機升降,多數由日本同韓國飛嚟嘅機,所以關島機場日頭會變成軍用機場睇嚟就唔多成立~ 反而老娘比較相信另一個說法,就係「飛機的利用率」!利用插空隙嘅方式,安排飛機係夜晚出發,飛機一早到達目的地〔關島〕後,就可以再安排飛去其他地點。咁樣就可以提高飛機嘅利用率,又可以降低營運成本~ 老娘出城記 Travel with LoLeung Facebook: https://www.facebook.com/travelwithloleung/ Blog: http://travelwithloleung.blogspot.hk/