古宇利島與古宇利大橋 喺名護市出發北上，去古宇利島，需要35分鐘車程。 黎得古宇利島，就必經古宇利大橋。古宇利大橋全長約兩公里，係一條完全筆直既大橋。呢條橋兩邊都設有行人路，但我絕不推介各位用佢黎行去對岸，因為路程太遙遠。而且呢條橋無瓦遮頭，比猛烈既太陽咁曬法，就同煎雞蛋一樣。我亦親眼見有人在路中心中途停車同落車影相，此舉並不鼓勵，係非常危險，因為上述路段為雙線雙程行車，後方車輛正常程況下無法扒頭。麻煩各位駕車人士都是遵守道路安全 (橋既兩端都設有無料停車，但車位有限，影橋與海既朋友可以作短暫停泊)。 古宇利島水清沙幼，當日見有很多日本人都黎呢度嬉水暢泳 (當地人都黎就知係個好地方)，仲布人黎影婚紗相。海灘附近設有店舖售賣及租借用具，而呢度提供既設備亦有一定水準，可大膽講句呢度硬件同軟件都齊備。各位可盡情感受陽光與海灘。 環古宇利島一周，大約只需15分鐘車程。沿車路上到比較高的地方，再望返落橋，有種大地在我腳下既感覺。 呢度亦有一個景點 — 心心石，但大家真係要比D幻想同就下角度先可以睇到。 美國村 喺沖繩見到摩天輪，就代表黎到美國村。美國村就喺國道58隔離，非常易搵。呢度最吸引既地方就係有間AEON超級市場，夜晚8點半後有降價優惠，仲要開到零晨12點。對於一眾購物狂黎講，真係AMAZING。 由於沖繩曾受過美國管治，所以部份地區擁有濃厚既美國文化及色彩。在美國村內，就有大量含軍事元素既飾物及衣著出售。而附近既餐廳亦大行美式風格，快餐店、扒房隨處可見。而美國村同宜野灣由於沿海岸線，附近亦有公眾免費泳灘，雖然海灘並不大，但不失為一個吹吹風、悠悠閒既好地方。 國際通 大名鼎鼎既國際通，相信有黎過沖繩既朋友仔一定有去過。而無黎過既亦一定有聽聞過。要去全場1.6公里長既國際通，只需乘搭單軌列車，去到県庁前駅、美栄橋駅或牧志駅 (真係是旦一個站落車都去到)。 無論喺日頭、中午定夜晚，黎到國際通都會滿足到你對衣食住行既慾望。特別推介將國際通列為旅程最後衝刺既地點，兩旁既各式店鋪絕對幫到你解決手信既煩惱。
