美麗海水族館其實係國營沖繩紀念公園海洋博公園內既一個場館。但由於呢個水族館太過出名，所以大家都以為佢就係公園既名。而喺國營沖繩紀念公園海洋博公園入面既野，顧名思義都係與海洋有關。 由沖繩北部既名護市21世紀之森公園附近出發，揸車去海洋博公園都要大約40分鐘，可想而知如果選擇喺沖繩南部或中部做起點，係要用多幾多倍既時間先可以去到。 (提提大家，呢個已經係揸車時間，如果各位係諗住坐巴士去，就真係要好好安排行程) 大家或者有所不知，海洋博公園喺免費入場既，要入入面既部份場館先會收取入場費。而公園內設有多個免費停車場，當大家參觀完一個場館，係可以誇張到揸車再去另一個地方附近再泊車，可想而知呢度地方係有幾大。離水族館最近既停車場係一個多層停車場，如果無記錯應該是停車場7號。亦即係話大家如何想一日內去晒咁多個場館，差唔多係由朝玩到晚，所以時間分配同管理上就要做定功課。 今次行程既重點，當然係美麗海水族館。提提各位，在每日下午四時後先買飛入場會提供折扣優惠，票價會由成人每位1850YEN降至1290YEN，中小學生亦有優惠，而6歲以下小朋友全日免費入場。適合一家大細，特別係有小朋友既家庭黎。點解我會提提大家呢? 因為根據我親身經驗，四點後呢度會比較少人入場，再加上留喺度既亦多為日本人，會比較方便參觀。 黑潮之海，係呢度既王牌。大家可以透過全日本最大水族館既巨型玻璃，欣賞到呢兩條鯨鯊 (入面其他海洋生物其實都好吸引，但一對比起呢兩條龐然大物，就真係好難吸睛)。而影呢幅相，亦成為指定動作。 作為有質素既旅遊達人，希望大家可以自律，喺影靚相時唔好開閃光燈，避免影響同嚇親其他海洋生物。 美麗海水族館大約用兩個鐘內就可以睇晒，之後就可以直落底層買手信。 臨離開時，望向大海，鹹蛋黃又出現在眼前。 (所以我話選擇四點後入場有好處) 眼前既一切，就好似同我講緊 辛苦，但值得。
