第三站 万座毛(まんざもう) 住得北部名護，就要有心理準備無架車喺身邊，去邊都唔方便。你諗下連去間便利店都要揸5分鐘車先去到，就知想喺酒店附近食餐飯都唔係一件易事。 喺訂酒店既時候，真係唔好介意比多少少錢選擇包埋個早餐。如果唔係，空肚揸車出發真係慘過空肚食早餐。喺日本食早餐，大多為自助餐形式，西式日式混合，除非你話一定要食中餐喇，否則都必定啱你口味。 食過早餐，就出發去万座毛。沖繩既天氣，就好似女性既心情一樣。明明睇晒天氣報告話天晴出太陽，佢可以突然飄舊大雨雲喺你頭殼頂落暴雨咁，之後又出返個太陽，驟晴驟雨，真係吹脹。所以去旅行，遮同護照一樣都係唔少得。 由酒店去万座毛，GPS顯示要揸40分鐘車到達。之後我地又再沿國道58 (無錯，又係國道58)前往目的地。放心，日本GPS非常準確，你跟住佢指示，佢就會直接帶你去到門口。万座毛附近有三個無料停車場，其中一個就係正門口，目測約五十個位 (但就最多車排隊等入)。另外兩個就遠DD，要行條斜路仔先去到正門，但就大把位，唔駛等，任你泊。 (利申﹕我係閒日去，假日情況可能截然不同)。 要睇外形如象鼻既万座毛，基本上用10分鐘內就已經KO佢。大家黎呢度目標都係得一個，所以影完相就會走 (加上去到由落微雨變成落巨雨)，同埋人真係太多，影親相都有手手腳腳同人頭攝鏡。 睇完有感﹕未黎睇過既要黎一次 (但唔好抱有期望)，黎過既就會明咩叫一次便足夠呢個道理。 第四站 殘波岬 白色燈塔殘波岬，我覺得比万座毛更值去 (如果係二選一)。 由万座毛揸車去殘波岬，要大約40分鐘。揸車揸到尾段，在遠處已經望到個塔(咩都無，所以真係太搶眼了) ，佢附近有個殘波海灘，聽聞出名水清沙幼，而沿住海岸會經過好多間酒店。泊好架車後 (又係無料任泊)，就開始出發。殘波岬係沖繩海岸國定公園，呢度人流少，地形闊落，仲有架歐美式小食車長擺喺度。絕對適合HEA。 影相打咭方面，呢度你直情可以訓喺地扮金絲雀影都無人理你。除左燈塔同大海做背景，仲有一大堆岩石任你影。呢個燈塔仲可以比錢 (200YEN)上去塔尖觀景台。不過要行99級樓梯到塔頂，都係唔多啱我口味。 途經沖繩大獅子(石)像. 提提朋友仔﹕呢兩個位黃昏黎睇係會加分既，佢個鹹蛋黃加大海特別啱情侶開餐.
