第一站 白色小屋—瀨長島 自駕由OTS那霸空港店前往瀨長島，GPS顯示只需7分鐘車程。作為黎到沖繩既第一站景點，當然係醫肚大過天，而瀨長島亦非常稱職，無令肚餓既我失望。在路邊泊好架車 (附近係設有無料停車場既，但已經爆晒，而島上劃出左邊道路為泊車位應付不絕既車流)，就開始尋找他鄉的美食。 瀨長島，島如其名，沿海而建，無邊際海景一覽無遺。呢度設有三十幾間舖頭，當中有三份二既舖頭都係食肆，無需左搵右搵，各國美食一應俱全。而喺食野既同時，各店亦設有有冷氣既室內位，同曝露於大氣之中但有瓦遮頭既室外位 (好處係可以食埋個海景落肚，一舉兩得)。不過9月既沖繩仲係熱到HIHI，諗住坐室外位既朋友仔真係要評估下自己既耐熱能力值。費是熱到個人忟到爆，D汗流到水浸咁，咁放咩入口望咩靚景都無晒心機，晒曬! 除左醫肚，瀨長島亦係一個好啱做個文青打下咭既好地方。一堆白色小屋附設樓梯任你影，沿海就有大塊綠色草地配藍色海景做背景任你坐、任你影，睇日落一流。呢度未計食野都夠你消耗1-2粒鐘，不失為一個重要CP。 難得黎到，一於試下係日本名氣甚高的幸福PANCAKE (幸せのパンケーキ)! 呢間PANCAKE大阪、京都、東京都有分店. 我地叫左雜果梳乎厘PANCAKE(加左雪糕)同原味梳乎厘PANCAKE兩款.係下午兩點前黎仲可以ORDER鹹食如奄列添! 沖繩分店室內位子只有二三十個，戶外位則是室內位子的兩倍，可想而知室內位子有幾搶手，見店員有為訂座服務的顧客留台，大家如果唔想呆等，可試下訂位. Pancake 製作需時，起碼要等20分鐘.三大塊厚厚的PANCAKE配上蜂蜜奶油出場，梳乎厘般輕軟口感的PANCAKE一點都唔會膩! 第二站 泊港漁市場 沖繩四面環海，咁一場黎到一個環海地區，無奶油唔食當做既海鮮。所以，就算啱啱醫左個肚，都要再醫過。 之後就轉戰—泊港漁市場。呢度有咩咁出名?就係因為佢係當地漁船埋岸既直送位置。連位於市場本通 (國際通附近)既第一牧志公設市場既食肆食材都係由呢度供應。正所謂食剌身，最緊要新鮮。 由瀨長島揸車過去泊港漁市場要大約廿五分鐘車程 (其實係因為塞車問題，同埋個市場都算近市中心附近)，車位方面目測大概有廿個左右 (喺正漁市場正門入口對出)。一落車，仲未入到去，嗰陣魚腥味已經出晒黎。佢入口位置非常低調，呢度由於不設堂食關係，打大佬秘訣為散打為主，見啱就上。各位朋友仔可以選擇買上車慢慢嘆，又或者喺市場角落頭搵張枱企喺度慢慢享用(但地方唔大，人多時會比較迫)。市場內大約有廿幾檔賣刺身或壽司既舖，兩句講晒，基本野一定有，稀有野唔好求。價錢一搬，但起碼新鮮。如果黎沖繩真係想食最新鮮既刺生，呢度係不二之選。 呢個海鮮丼300YEN 咋，好好味，又抵 (臨閂門減價既時候買既)! 但黎泊港漁市場搵食最緊要及早。當我下晝四點幾黎到時，已經得返5-6檔舖仲有開，仲要係一路洗緊地等收舖。如果諗住行多兩個圈睇睇，就真係得返個諗字。所以不妨考慮先到訪泊港漁市場，後入瀨長島。不過瀨長島餐廳的營業時間都有早有遲，大家睇時間做人!
