由於第一二晚酒店揀左喺名護市 (玩法係由遠至近)，所以北上係無可避免既。而較早前曾提過，今次旅程並無使用過有料道路 (即收費高速公路)，咁點樣可以一路向北呢?答案就係全靠行無料既國道58。 點解要揀行國道58? 除左係無料呢個原因外 (行收費高速公路全程大概係日元1020YEN，大約港紙72蚊)，可以邊揸車邊睇海景亦都係原因之一。國道58沿海岸線而建，途經那霸、宜野灣、北谷、恩納及名護等多個名勝地點，可以話一條國道58已經貫穿大部份沖繩地區。相比之下，有料道路雖然係高速公路，可以用錢去買時間，但沿途景色欠奉，而且只比無料既國道58快半個鐘左右，值唔值就好見仁見智。 9月既沖繩，仍然係差唔多夜晚7點後先日落晒。所以在揸車北上既過程中，個鹹蛋黃陪左我地大部份時間，非常吸睛。而且國道58係一條直路多，彎位少既道路，新手上路亦無須太過擔心。值得一提係沖繩一入夜馬路兩旁就燈光欠奉，而且部份馬路上線位顏色太淡，或會造成指示不明顯及清晰，再加上國道58大多為雙線雙程行駛，難以超車。甚至，在行駛彎位時亦會被對面行車線車頭大燈突然照射做成「殘」眼及視野不清，車手們要加倍留神。 用左大約兩小時十五分，喺平均65KM/HOUR既車速下，終於安全殺到上名護市既酒店。
