機票篇 今次沖繩之旅係乘坐香港航空出發 (P.S樂桃航空將於2017年10月後停飛香港—沖繩航線，將來要去既朋友仔就得返香港航空同國泰港龍選擇)，而機票價錢撞正做優惠就每人約$1400 (已包行李及機上餐飲)，如選擇10月至2月秋冬時段出發，更會低至$1100左右 (但當然水上活動欠奉啦)。 機程約2小時15分鐘左右，而坐位較一般廉航eg.樂桃、香港快運闊落及舒適 (但當然係一分錢一分貨，所以好根據個人喜好選擇)。基本上，在機上睇一套戲，或者訓個教，就已經到達沖繩。而餐飲方面，佢地提供既係一個包，一盒水，同埋一杯飲品。總之有定心理準備係餓你唔死、但又食你唔飽 (都係一分錢一分貨啦)。 呢個係奶蛋素飛機餐，雜菜三文治. 香港航空仲有好多特別要求既飛機餐可以揀，缺點係不可以用自助機器CHECK IN，一定要排隊. 話咁快就準時喺日本時間11點降落。那霸機場唔大，機場另一邊就已經係空軍機地。而入境櫃檯亦不足以應付落機人流，請有心理準備及見諒。大約45分鐘後，終於完成過關。而行李亦被細心既機場職員由輸送帶取出，整齊排列在一旁。拎齊行李，就要出發去第一個目的地—OTS那霸空港店。 自駕遊租車篇 一出離境大堂，就已經見到各間租車公司職員在排列等候，職員核對單據後，就會派一份文件及指示你向旅遊巴位置，再車你去OTS那霸空港店 (車程約15分鐘)。今次，我係官網選擇OTS既40天前早鳥優惠，租一架五坐位混能車，時間4日3夜，價錢連安心保險包總數係港紙大約1200蚊。(所以人數越多就越著數) P.S提一提醒，如果諗住去沖繩中部及北部，唔揸車係會非常唔方便，因為巴士班次疏，約一小時一班。而且巴士收費都唔係平。加上沖繩泊車位多，當地人駕駛態度良好，所以可以既話，盡量選舉沖繩自駕遊。 租車只需帶: 1.一張有效年期內既香港駕駛執照 2.一張有效年期內既國際駕駛執照 (香港運輸署發牌費為港幣80元，有效年期一年，可即日取證) 3.足夠既租車費用 (銀行咭或現金) 4.已預約既租車文件 喺OTS排隊拎車期間，公司部電視會不停播車CAM內影到因不小心駕駛而發生炒車既影片，好似洗緊你腦同緊你講亂咁揸車既後果。又有職員用國語向顧客簡介沖繩安全駕車須知同求助方法，同埋佢地都會強烈建議買份安心保，不幸撞車或被撞，只要報警同打個電話比公司通知聲就得，唔駛擔心賠償問題。由排隊到拎到架車都用左一個鐘左右 (又好難怪佢地，因為真係太多人排隊租車拎車)。喺拎到車後，個職員會陪住你一齊檢查架車同MARK低架車邊度有花有痕同有凹 (放心，真係會驗屍咁驗)。最後，檢查好晒，再由職員睇實你按步驟開動一次架車，加埋簽個大名，就可以開始行程。 喺沖繩點解咁多人自駕遊?因為方便。咁有幾方便?答案係真係好方便。 職員在帶你取車後，會幫你調教GPS導航既顯示語言，然後根據佢派比你既注意事項尾頁會有各名勝及部份酒店既MAP CODE去輸入 (注意﹕入MAP CODE係準確過入電話號碼)，就會顯示到由你現正身處位置前往目的地既距離，時間，行車路線 (有多條選擇，甚至有得揀有料道路或無料道路，任君選擇)。之後只要根據GPS既聲音遵航及道路屏幕顯示黎駕駛，就可以到達目的地。 P.S 雖然我鼓勵大家喺沖繩駕駛，但切記要量力而為。新手同假日司機最好要喺香港搵師傅補下鐘 (利申﹕去之前我自己都喺香港操左兩課)，賺取路面駕駛經驗，特別係泊L位 (因為沖繩大部份都係)。而沖繩中部至北部大多都係雙線雙程路，冇咩位可以扒頭 (我指既係無料既國道58，當然收費既高速公路就例外)。 另外，我地租既車是無USB插頭的，唔知係咪車款問題，大家想用黎差電或者用電話播歌既要留意下. 大家記緊安全駕駛啦，免得發生意外，影響旅程同心情。
