今日我要介紹一下烏溪沙站新開燉湯店【湯房】湯房◌ 馬鞍山烏溪沙站M12C (B出口轉右即到) 因為我去開馬鞍山搵我舅母間診所驗血，順便再去埋隔離烏溪沙站呢間網上流傳好正的湯店一試。 佢呢間店仔細細，主要都係做外賣，不過都有堂食，為左影相，我梗係要堂食，但我地次次影野都叫到成檯係野，所以捉埋我partner Echo 佢去幫手影相同食野啦 佢呢度有賣燉湯+糖水，我好鍾意飲燉湯架，但我唔會幫襯楊明，所以要介紹大家飲呢間，正！另外佢D糖水都好吸引，所以都叫哂黎試下～～ 我地兩個人本來只係叫一人一盅，不過叫完之後佢聽老細講有一個椰皇燉雞好正，於是佢又叫埋.......佢真係癲架！ 青邊鮑魚日本元貝花膠螺肉瘦肉燉湯 HK$89 我叫呢款因為佢真係有好大隻鮑魚呀～～～～好正呀！！！！！！鮑魚有成隻匙更咁大隻，好足料唔係講笑，咬落去好滑好彈牙，真係好正！但分左半隻比佢食真係好唔甘心，我下次去要自己一人食一隻！ 我挖起d渣，好多料，仲有瑤柱、花膠、螺片、瘦肉，勁多材料！ 因為係燉湯，所以d味唔會散走，會焗實哂係個盅裡面，味道好咸香好鮮甜，好濃郁海產鮮味，真係好鬼好飲！！店主話呢款湯係滋陰保養，補血養顏，補腎，好健康呀！雲水菜乾雞腳燉豬肺燉湯 HK$69 呢款佢裡面有好多菜乾，原來係叫雲水菜乾，佢令到成盅湯都有D微甘苦味，有別於死咸的味，好有新鮮感，我仲食到佢落左少少魷魚乾，所以有少少咸香鮮味，最正係佢落左好多豬肺，好好食呀～～～～ 我好中意食豬肺，因為其實好花功夫，店主話佢地日日去街市買新鮮豬肺製作，啤水啤到白哂為止，好乾淨，絕對唔係簡單菜式，所以我出去飲湯好鍾意試豬肺湯，因為而家冬天止咳潤肺，對身體好好架，勁補勁滋陰～ 原個椰皇燉雞湯 HK$59 呢款係佢加單的，我覺得佢呢次做得好正確，真心係要試，佢個湯原來用左椰皇水燉雞，飲落去已經好勁椰皇味同雞油香，好清新好濃厚 加上圓肉紅棗，有微微清甜，好有層次。呢款椰皇燉雞飲完好開胃好暖胃，飲完特別舒服，清肺止渴，正呀！ 杞子藥饍燒賣 HK$10/5粒 佢收銀處果度收埋左一籠蒸點心，因為見好肚餓所以試左一碗，點知原來佢唔係d頹廢燒賣黎架，係淮山當歸杞子豬肉燒賣！ 佢口感好綿密，唔會好實淨果種，感覺好鬆軟，咬落有少少藥材味，杞子味好香好過癮，加埋D豬肉好有口感，HK$10有5粒又幾抵食喎，平時出去食d垃圾魚肉燒賣都要啦。 講完燉湯，其實佢仲有賣糖水架，真係好想試埋，一場黎到又未食飯，一於食盡佢！ 糖水方面我首推呢款 鮮奶紅棗燉桃膠 HK$49 鮮奶紅棗燉桃膠呢碗開頭睇好似無咩料到, 不過我好鍾意食桃膠所以一於試下。到左我撈上來睇下，嘩嘩嘩！好大舊桃膠呀!!!!!!!!!!! 佢裡面除左巨型大件桃膠之外，仲有杞子紅棗，岩哂D女仔食呀~~~~加埋鮮奶味好香好甜，真係超級好味！ 點解我咁鍾意食桃膠？首先桃膠佢係桃樹上面傷口上面分泌的膠質，所以佢膠質豐富，係保持青春其中一個法寶！而且桃膠可以清血脂，有助排便同舒緩壓力，對於女性黎講係特別有益！同埋佢地甜品係絕對少甜, 聽講無落糖，純粹靠紅棗同埋杞子甜味，真係好清香好正！燕窩椰皇鮮奶燉蛋白 HK$49 佢呢個燉蛋白用原個椰皇燉，而蛋白唔係溝水，係用原個椰皇水黎燉！真係超級清香呀！佢用椰皇水黎，所以食出黎個甜味真係完全唔同，平時出去食燉椰皇蛋白係用糖溝出黎，呢個真係不得了，好清甜好天然呀~~~~~ 椰皇燉蛋白都未講完，仲有面頭一大堆燕窩！好誇張好正呀~~~~~我諗好多女仔而家都睇到心心眼了吧? 真心好正好養顏，勁多蛋白質，可以補骨膠原呀~~~~ 超正呀, 真係好好味~~~大推 原個木瓜雪耳燉鮮奶HK$45 呢個木瓜燉雪耳比較正常，無咁精彩，不過佢就好足料，有超多雪耳，又係女性補骨膠原一流，清心潤肺，加上木瓜既熟度岩岩好，一啖入面有齊雪耳木瓜蓉，淡淡牛奶清香，口感好豐富。 呢款又係無落糖的，全靠裡面有紅棗杞子木瓜甜味，所以女仔食左唔怕肥呀~~~ 見佢地D燉湯同甜品咁正，就同老細吹下水啦，老細話佢地鋪頭做街坊生意，有街坊指定一d湯水係佢地menu冇既，佢地都一樣會幫客做架！例如有客人keep住同佢地訂素湯，要無肉嘅，佢地都會特別燉比客人，真係好正~頭先咪話佢地D糖水無糖嘅，有糖尿比較高既客人要佢地做走甜/少甜既糖水，佢地都有幫客人整架，真係好細心好有愛。我覺得佢地好有心，盡量都滿足唔同客人既需求，希望客人食完都會感受到小店既人情味。如果你住馬鞍山線，咁你就有福啦！因為真係可以成日去飲啦~~~如果我住果頭我諗我日日都去買黎飲，性價比真係好高呀！我覺得我最推薦果樣係桃膠糖水呀~~~因為真係好多大大舊桃膠呀!!!!!!最後我一個人包底食哂，真係好正~~~~ 📷 Sony ZV1 @sonyhongkong📸 cameraman - @mr.travelgenius📝 窮遊達人 - 官方網站https://www.timbeelo.shop/足本節目 ⏬Full Version ⏬Facebook/YouTube 搜尋Search🔥窮遊達人 Mr. Travel Genius🔥🎬 YouTube Channel -https://www.youtube.com/c/%E7%AA%AE%E9%81%8A%E9%81%94%E4%BA%BAMrTravelGenius/featured🅿️ Facebook - https://www.facebook.com/mr.travelgenius/📸 Instagram - https://www.instagram.com/mr.travelgenius/
