疫情以嚟都好少去行商埸，過海就更加少，見部電腦腎腎哋就諗住換部surface，年近歲晚出面有好多優惠，Microsoft本身有特價，加埋大牌電器舖又有信用卡優惠，然後再搵埋商場優惠，貨比三家後，就去咗銅鑼灣時代廣場入貨，每消費八百就送一百購物券+五十餐飲券，指定日子仲有雙倍著數，順便半價買多對波鞋，又可以出街食多兩餐飯，計落都幾抵！二人飯聚令下好耐冇幫襯過中菜，反正有優惠就去試咗位於11樓嘅#鴨大哥，哩間餐廳聽聞係由廚魔主理，之前都有聽聞過，今次用半價幫襯感覺特別抵！ 咪見佢門口隻鴨仔咁靚而有期望呀，室內環境其實好一般，大家都係做鴨，同#萬象天地 間#羲和雅苑 真係冇得比，人哹價錢仲要賣平一半......得兩個人點咗半隻烤鴨，唔敢叫太多只可以加1個送再加1個點心，反正主角(烤鴨)已點！五香鴨絲春券 $42為貫徹今餐"烤鴨"主題已點，就係一瑹碟好普通嘅春卷，賣相味道都冇驚喜，烤鴨味道亦未見好特出。 北京烤鴨半隻 $288唔知係因為叫得半隻定係疫情關係，並唔係師傅即場表演片鴨，上檯時已經分片好晒，有連皮帶肉嘅，亦有全皮嘅，半隻嚟講都算細份，醬汁比傳統京菜館多少少花樣除咗海鮮醬、青瓜條、京蔥絲之外，仲有蔗糖同日式芝麻醬，不過服務員完全冇介紹過點樣食法，等你自由發揮~哩個用餐體驗又要輸比深圳羲和雅苑喇！ 帶皮帶肉嘅一款，雖然完全冇膻味但亦冇咩鴨肉味，肉質又唔算嫩滑，真係非常普通！全皮一款唔算非常酥脆，不過佔少少蔗糖一齊食，味道清新都算幾好味。不過總括嚟講，即使唔同羲和雅苑比較，都比唔過美中鴨子啦！唯一抵贊係塊面餅食到尾都係咁軟糯有彈性，十足成塊Mask咁！ 蒙古式炒鴨鬆 $98可能係因為我覺得間餐廳掛住廚魔個朵，好多嘢都要求高咗，下面咁嘅賣相真心覺好Hea囉！所謂蒙古式就係落咗啲西域香料，好似孜然粉，味道方面咪就係食到孜然炒鴨肉粒囉~開始懷疑係係咪收錯料？哩間嘢真係#廚魔 主理？ 鴨大哥 Forbidden Duck地址：銅鑼灣時代廣場10樓1001B號舖電話：28828600營業時間：11:30~15:00；18:00~22:00#北京烤鴨 #pekingduck #銅鑼灣美食 #時代廣場美食 #causewaybayfoodie #timessquarefoodie #hkfoodie #hongkongblogger #得閒食飯 #美露迪
