曾幾何時深井燒鵝確實係香港之光，賣到街知巷聞，不過又有幾多人會專登入#深井食燒鵝 先，去深圳易過去深井啦！過去5年我應該只入過一次深井咁大把~最近發現#深井裕記 向尖沙咀亞士厘道開咗間副線叫#裕鵝莊 ，餐廳就獨孤一味主打燒鵝，其他招菜式欠奉，當然啦有入過深圳食飯嘅都知道，除咗燒鵝都真係得燒鵝好食架咋！哩個亦係深井飯店式微嘅原因，事關市區有好多大牌酒家做嘅燒鵝水準都唔錯，皮脆肉嫩價錢平，行內競爭非常激烈~哩間裕鵝莊論裝潢走時尚路線，不過有啲尷尬事關又唔係IN又高檔但又係唔Cheap咁，有啲似茶餐廳感覺但又偏貴少少，有啲兩頭唔到岸~ 燒鵝(下庄) $190食燒鵝想食脾位就梗架啦，單叫一隻鵝脾飯都成百蚊啦，二人限聚期間梗係叫份下庄，大家可以一齊分享啦，再點多一兩個菜，有得夾夾下餐飯先冇咁單調架嘛！燒鵝上檯時都算熱嘅，不過皮脆肉嫩又真係唔講得，雖然係下庄部位但唔係厚肉，好香又唔講得上，味道都還可以嘅，就係欠缺啲特色咁囉！ 懷舊蝦多士 $78唔知點解近排好想食蝦多士，所以今日見到就即刻叫，傳統蝦多士例排跟碟沙律醬，不過哩到冇，問都冇嘅，原來係撈咗層金沙，已經夠晒味，炸得都幾酥脆，不過件蝦多士實在太單薄喇，叫做有6件但係超薄，蝦肉好少原全食唔到蝦膠味道！其實可以俾4件每件大一倍嘅，我估冇論賣相同口感都會加番好多分囉！ 鵝油炒芥蘭 $88冇油膩感口感都算清爽，芥蘭炒完都仲好翠綠，唔太腍又唔會太硬，都幾好，不過啲菜一咋打亂晒咁上碟賣相就差啲囉~(圖：後期製作)*茶芥$16/位另收加一，不過7點前入座帶位阿姐額外醒咗個8折俾我哋，用openrice訂位都一樣有8折。裕鵝莊 Goose Manor地址：尖沙咀亞士厘道37號九龍中心地下C號舖電話：23871133營業時間：每日11:00~23:00旅遊網誌：http://travelermel.blogspot.com/Instagram：https://www.instagram.com/followme_lody/#尖沙咀美食 #深井美食 #香港美食 #tsimshatsui #hkfoodie #hongkongblogger #燒味 #斬料 #得閒食飯 #美露迪
