又去唔到旅行，就唯有用舌尖遊世界啦！今晚去咗佐敦食泰菜，希望藉此一解相思！仲以為咁嘅裝潢咁嘅格局，價錢會相對便宜，點知都貴貴地喎！菜式選擇都係大路嘢啦，招牌菜就有火焰燒雞同埋芒果糯米飯蛋糕，諗住順便嚟幫朋友食慶生飯局！ 咖哩軟殼蟹麵包$188 軟殼蟹應該有兩隻，特製大麵包個器皿，本嚟麵包同咖哩係絕配，點知個包只係少少熱，真係未食過咁差嘅麵包囉！嘥晒啲咖哩！ 泰北冬陰公湯 $118 味道中規中矩啦，都算幾足料嘅，搵到大大隻大頭蝦！唔會太辣又唔太酸，啱啱好！ 街邊燒牛肉 $98 後悔點解唔叫豬頸肉囉！應該係燒好頗長時間，肉有啲鞋又有啲韌，仲要唔熱添，唉~失敗！ 火焰燒雞 $188 視覺效果都唔錯，現場有啲氣氛，不過有姿勢就冇咩實際，略嫌肉質有啲實，醬汁味過甜！最奇係隻雞得個面係熱嘅，肉都係攤凍晒嘅！ 平民鹽焗魚 $168 鱸魚肉質都幾嫩滑，帶少少香茅嘅香味，配地道泰式青檸酸辣汁，的確夠晒開胃又惹味！ 芒果糯米飯蛋糕 $238 應該係即刻現做嘅，事關糯米飯仲帶少少微暖，口感軟熟，芒果夠晒鮮甜又足料，作為飯後甜品嚟講一行七人訂個細嘅就已經啱啱好！ 餐廳水準只係一般啦，唔係話佢服務唔好，不過上菜速度真係快得驚人，落完order唔夠15分鐘已經放滿全檯喇，張檯又細又唔夠位擺，真係開Turbo都食唔切囉！點都應該俾番100分鐘用膳時間掛！食到趕頭趕命都唔知為乜！ 泰灜 Thai-In 地址：佐敦吳松街141號地舖 電話：28699986 營業時間：12:00~15:00；18:00~23:00 旅遊網誌：http://travelermel.blogspot.com/ Instagram：https://www.instagram.com/followme_lody/ #泰想去旅行 #泰想飛 #泰國菜 #佐敦美食 #芒果糯米飯 #TomYumGoong #hongkongblogger #hkfoodie #得閒食飯 #美露迪
