Day 2行程為釜山站➡️甘川文化村➡️南浦洞➡️札嘎市場 <第一站 –釜山行 Busan Station> 其實釜山站係冇咩特別嘅 LOL，但係如果大家想一次玩釜山同首爾，除左飛機之外，KTX都係一個好好嘅選擇。不過懵豬去釜山站唔係去搭火車，而係去換錢。同首爾唔同，釜山好似唔係咁多找換店＝＝前一晚上網搵，釜山站附近嘅上海門有好多商店都會同你換錢。我地去到見到有間中國人開嘅店，出面寫住接受換錢，就衝左入去。 終於有錢用啦！！！ PS. 所以都建議大家係香港／落機之後換少少Won先 其實釜山站都出名好多野食！我地去左초량밀면本家草梁麥麵食冷麵。未入去之前已經見到有好多本地人係出面排隊，證明質素有保證！而最後佢都真係比左大驚喜我地，大滿足！ 入到去我地簡左要除鞋盤腳坐嘅位（有風味Ｄ），冇咩點諗就叫左一碗水麥麵同一碗拌麥麵。見到碗面紅卜卜以為會好辣，但比想像中冇咁辣，懵豬都食到！而且碗麵好夠凍，加埋醋同少少芥末，酸酸甜甜辣辣咁，好開胃！同一舨冷麵唔同，麵身更彈牙，好QQ！ 食食下見到隔離抬叫左籠大蒸餃，每一個都係拳頭咁大！！！！熱辣辣好似好好味咁，最後我地都係忍唔住叫左籠。黎到真係呆左（呆呆獸出黎啦），一籠有六隻！！！！隻隻都拳頭咁大！！！！哈哈，但真係好好味，餡肉整到好細好碎，所以好易入口，必食！ 重點，我地叫左咁多野，飽到Lunch都唔洗食嘅情況下，只係需要大約港幣70！！好抵呀！！ 地址：부산광역시 동구 초량동 363-2 成人費用: 水麥麵 3500W (小)/ 4000W (大) ; 拌麥麵 3500W (小)/ 4000W (大) ; 大蒸餃 3500W 前往方法: 釜山站七號出口直走大約5分鐘左右 服務電話：051-462-1575 係韓國你會發行兩步就會有間Coffee shop或者果汁店，原來韓國人覺得食完一餐飯要飲埋杯咖啡先叫做"完滿"。我地去左一間叫JUICE 嘅飲品店，好似係BTOB代言嘅。而家好流行"半半果汁"，意思係個杯隔開左兩邊，你可以選擇2款唔同嘅果汁，一次過滿足你2個願望，最啱我地呢D有選擇困難症嘅人！認真，懵豬係韓國試左幾間果汁店，呢間係我飲過最好味嘅，用嘅係新鮮生果，而且仲會見到有D攪爛左嘅纖維。不過點都會加左少少糖ga la 。我就試左士多啤梨同香蕉，非常搭配！朋友試嘅係蘋果同奇異果，都唔錯，不防一試！ <第二站 – 去韓國版Santorini搵小王子> 甘川文化村係釜山必去嘅景點之一。呢到真係好靚，彩色小屋密密麻麻，所以有santorini之稱。呢到亦都係好出名嘅壁畫村，周圍都有大小不一嘅圖畫，記住準備好相機影Profile Pic！黎到韓國，女仔點都想試一試著韓服係咩感覺 :) 唔想係個D博物館hea著？甘川文化村其實都有韓服租借，價錢仲唔貴！坐巴士到文化村正門，直入左邊上一層就會見到。有韓服租之餘，仲有韓國高中校服借添！裡面嘅韓服好modern，好乾淨，會有人幫你襯好同著衫set頭（當然你可以自己選擇同點併）。 第一次著韓服，比起和服真係舒服好多，唔會cool住。一開始都會有D尷尬，但後尾發現呢到除左係遊客熱點，亦都係釜山人拍拖玩樂嘅好地方！唔好以為得外國人想試著，你會發現好多著住韓服校服的都係地道嘅釜山人！所以慢慢都唔覺得奇怪lu～你地可以去遊客中心買個地圖（W2000），跟住官方建議嘅路線行。我就比較鐘意即興同隨意，自己亂行。 行下行下你會發現有D好似點紙相機嘅物體，影完最後會出左一張印左你地個樣嘅卡，Haha都幾得意可以試下。（記住只可以入W1000同W5000 ga jar！） 行多陣你會發現坐左係欄杆嘅小王子同佢隻狐狸仔！呢到係重點推薦嘅影相位！不過著住韓服嘅就要小心D，畢竟個到都無咩扶手而且有一定的高度。大約係呢到行左3個鐘，走可以去番入口搭巴士去土城站／西面／南浦洞個邊，非常方便。 韓服租借價錢: 大約W10000一個鐘（頭飾同手袋另計） 前往方法: 地鐵土城站6號出口，出來後右轉走向巴士站，搭乘1-1, 2, 2-2巴士到甘川小學站、甘川洞文化村 <第三站 – 釜山版明洞> 如果話四面係東大門，南浦洞就會係明洞！係南浦洞你可以繼續你嘅出血大計。呢到好好行，一條大路都係唔同嘅商店，要咩有咩。同四面唔同嘅係呢到多d小商店同唔同嘅牌子，例如SHOOPEN、folder 等，仲有好多特色小食店、算命檔仔！黎南浦洞一定要留肚掃街！ 懵豬極力推薦大家試五穀糖餅，即叫即整，熱辣辣的黑糖餅皮包住唔同嘅nuts，外脆內軟再脆、3重口感，係釜山先有！除左必試的黑糖餅外，仲有各款韓國地道小食，好似魚糕串、年糕、煎餅... 一邊shopping一邊食 :) 步行街行唔夠？可以去埋Lotte mall！南浦洞無kakao friends, 但係有Line store！你會見到有一隻好大的brown 係度歡迎你。係呢到買野可以直接係商場退稅，好方便。呢到個音樂噴泉都好出，好多人都慕名而來。由11am 到9pm，每逢正點就會表演一次。 五穀糖餅位置: 近住BIFF廣場
