去完波上宮，上 Google 睇吓附近有咩食，見到呢間食堂嘅評分唔錯，就係響黑色鳥居嘅斜對面，就去試吓。 入到去感覺好似返咗去60-70年代嘅感覺，有一種溫馨家庭式嘅小店感覺，由幾位嬸嬸主理，見到都幾多人食緊嘢，都冇4個位一齊坐，牆上面有純日文字或者日文字加圖片嘅餐牌，Google translate 咗一陣決定到食咩，跟住剛好有一檯人走，我哋就可以一齊坐啦～ 🍴三枚肉蕎麥麵（￥800）呢款係好多人都會必點嘅沖繩麵，其實三枚肉嘅意思係三層肉（豬肉），肉煮到好腍，一咬就散開，而且好入味，另外仲有魚板同生薑，湯底似肉湯，濃味但唔會好鹹，蕎麥麵係比較寬嘅扁麵，唔錯～ 🍴炒野菜雜燴飯（￥700）呢個其實有D 攪笑，開頭用 Google translate見到係雜燴麵，心諗試埋炒蕎麥麵都幾開心丫，嚟到後後發現原來係白飯上面放咗炒野菜雞蛋同肉，味道相對普通，冇咩特別，另外跟咗一小碗蕎麥麵，個湯底同上面嘅麵完全唔一樣，係有少少鹹而且冇咩肉味，呢個一般。 整體上呢間店嘅三枚肉蕎麥麵幾好食，價錢平民化，當日見到一半當地人一半遊客，如果去波上宮附近又唔知食咩好，可以試吓呢間！體驗感受 ⭐️⭐️⭐️⭐️🔍Maruya Diner まるや食堂（那霸市。沖繩），日本📍2 Chome-9-15 Tsuji, Naha, Okinawa追蹤我的IG：tracyloveliving
