上一餐 brunch 食得好飽，下一餐已經係晚餐😂 帶隊嘅朋友係食素，佢本身揀咗另一間戶外可感受大自然嘅素食餐廳，不過因為落雨，去嚟都唔會食到環境，就轉軚去呢一間素食餐廳。我哋比起一般 dinner 時間早到，完全唔使等位就入到去。餐廳都幾大，我哋被安排去最入嘅卡位，坐得好舒服。 🍴慶春米糕（￥26）呢個用人手現磨有機大米粉，加糯米粉同有機椰子油，中間包住手工紅糖紅豆沙，一籠有4件，啱啱好每件都印咗唔同嘅字。白色外層因為有糯米粉，口感煙韌，有米香味同少少甜味，中間嘅餡料係紅豆沙，好味！ 🍴三杯茄子（￥36）呢款 under 江浙菜，特色係追求鮮味，唔會用過多調味同咸味去遮蓋食物鮮味，亦會落糖去提鮮，呢款三杯茄子用熱煱上菜，等咗幾分鐘仲係熱到辣口，茄子唔會煮到好腍仲係有咬口，幾惹味又唔會好咸，掂！ 🍴麻辣乾絲（￥8）乾絲即係豆腐乾切絲，佢嘅麻辣醬唔會太辣，上面嘅白芝麻粒仲可以提香，呢款小食份量唔少呢！🍴桂花荔浦芋頭（￥6）一碟有6大件，上面鋪咗桂花糖漿，桂花味同軟身嘅芋頭好夾，連我呢個唔太特色鍾意食芋頭嘅人都覺得唔錯（雖然唔會食多件😆），上網睇返，原來荔浦芋頭係廣西壯族自治區荔浦市特產，以營養豐富、肉質酥軟、味道芬芳嘅特點居於各種芋頭之上，被譽為“芋中極品”，根據記載，早在明清時期，荔浦芋已經成為朝貢皇家嘅貢品～ 🍴麻辣榆耳（￥24）我未食過榆耳，根據佢嘅資料，榆耳係珍貴嘅食、藥兼用真菌，有“森林食品之王”美稱，對胃腸道有保健消炎功能，食落去好爽口，同麻辣味好夾，上面有少少花生碎增加口感，好食～ 🍴自然農法榛果糙米漿（￥32）呢個 presentation 幾有 gimmick，用乾冰上，佢嘅做法係將炒香糙米同烤熟榛果放入破壁機打成幼滑狀態，再加入冰糖漿同堅果醬，入口時質感好厚身，亦都幾幼滑，米同堅果香味十足，飲完都覺得有少少飽肚感。 🍴南洋肉骨茶（￥36）呢個一大煲上，有白蘑菇、西葫蘆、老豆腐、香菇、豆卷、蟲草花、紅棗、杞子，都幾多料，先試吓個湯，係幾濃郁，唔算太重藥材味，當然唔可以同真正有肉煲嘅肉骨茶相比，始終欠缺咗肉味，不過作為素食嘅肉骨茶，呢個係做得唔錯幾好飲，味道係相對大眾化，我自己就覺得如果藥材味再濃郁D 會開心D～ 🍴黑松露炒飯（￥56）呢個當然唔係用真 • 黑松露啦，只係用咗黑松露醬，另外仲有白蘑菇、彩椒粒、橄欖菜一齊炒，炒飯粒粒分明有鑊氣，呢款係銷售排行榜第1，係唔錯嘅，只係我唔特別鍾意黑松露醬煮嘅食物。 🍴生煎包（￥32）生煎包一盤有5個，外型有D 似泰式草藥球，餡料係白蘑菇、香菇、西葫蘆，夾起一舊個底見到有好多白芝麻仲煎到好香，餡料多味道略為淡口，都算唔錯。 🍴粉蒸猴頭菇（￥42）呢個其實有少少怪怪哋，口感有D 似用粉包住炸咗嘅猴頭菇再蒸佢，口感有D 濕，味道唔算太突出，呢個一般。 🍴15年陳皮紅豆沙（￥22）呢個紅豆沙非常濃厚，紅豆勁起沙，唔算好甜，有陳皮味但唔算太濃郁，整體上係幾好味，因為響香港已經好少食到咁起沙嘅紅豆沙啦～ 🍴豆香麻糬（￥22）非常煙韌軟糯，夾埋面層嘅花生碎同黑芝麻食，唔算好甜，好味！ 🍴椰香黃桃西米露（￥16）呢種西米係比較大粒，似紅豆嘅 size，食落口感同細粒嘅感覺好唔一樣，似食煙韌版爆珠咁，椰汁味幾香亦唔會太甜，好味。 叫咗13樣嘢，有齊小食、主菜、甜品，每人都唔使100蚊，食物質素比起好多香港嘅素食餐廳好食同精緻，地方夠大環境好亦都坐得舒服，服務員多不時會幫你斟水，開放式廚房 work station 分類清晰，見到都幾整潔，呢一餐食得開心又滿足，性價比高。 離開餐廳時見到一大條人龍等位，都有見到服務員帶住一盤飲品俾等位嘅人飲，後尾上網睇先知道原來呢間係人氣店，仲有米芝蓮推介嘅餐廳，冇得訂檯要食係要排隊，慶幸我哋早過晚市到達完全唔使等位。 食完飯響附近逛咗一陣就搭的士去深圳灣過關，12小時深圳快閃完滿結束，多謝帶隊朋友同好正嘅隊友，今次玩得好開心！體驗感受 ⭐️⭐️⭐️⭐️⭐️🔍慶春樸門（深圳萬象天地），中國追蹤我的IG：tracyloveliving
