自從上個月去完廣州滑雪後，對於北上呢件事由抗拒變成 neutral，唔太熱切亦唔會主動想去，但至少冇咗嗰份抗拒感，當然我仍然唔會有佢哋嘅 app 同電子錢包。朋友突發話去深圳快閃，如果係星期六/日我就未必會 join，我實在太怕多人，只要佢哋接納我咩都冇就 okay～ 我哋朝早未食早餐8點幾出發，坐巴士去福田口岸，過關排2-3個人，勁快已經過完關，跟住上的士去平安金融中心，去呢間食早餐。朋友響上海食過呢間話佢嘅 bakery 嘢好食，佢嘅門面都幾靚，display 見到好多款式嘅麵包。點餐掃檯面嘅 code，我哋4個人，兩個冇得上網，一個冇裝 app，得帶隊朋友可以掃餐牌😂除咗早餐卡係套餐外（一包一咖啡），其他都要散叫，叫完會有職員送餐。 🍴桑巴醬煎大蝦蛋餅（￥68）呢個賣相係唔錯，有桑巴醬煎蝦仁、蛋餅、平菇、菠菜、混合芝麻，開頭睇相時以為蛋餅係比較厚身嘅，原來係好薄，份量都幾大，有6隻蝦，size 都okay，咬落去夠爽口，桑巴醬辣辣哋幾惹味，唔錯！平菇份量多，睇外觀有D 似豬肉，炒得幾入味，菠菜配上黑白芝麻都唔錯。整體上係幾好食，可惜有少少敗筆係越食越多水（唔係汁），應該係菠菜炒得唔夠乾身，不斷出水，食到中間已經成碟水。 🍴煙燻三文魚班尼迪克蛋（￥68）呢個有煙燻三文魚、菠菜、班尼迪克蛋、吐司、荷蘭汁，其實 Egg Benedict 只要個水煮蛋夠流心，hollandaise 個味調較得好亦冇整到 split，都唔會錯得去邊。呢個做得唔錯，水煮蛋夠流心，同上面一樣嘅敗筆都係菠菜太多水，下面嘅麵包會浸濕晒～ 🍴果仁麥片鮮果酸奶杯（￥28）Granola 同 yogurt 分層，唔會浸淋，有新鮮士多啤梨、藍莓同桃，yogurt 係原味同埋比較厚身，唔錯。 🍴花香荔枝厚椰拿鐵 BSLK（￥38）呢個有荔枝、厚椰乳、橘子花糖漿、意式濃縮咖啡，唔知 BSLK 意思係咩。一啖飲落去最出嘅係椰子味，之後飲到咖啡味，after taste 先有荔枝味，description 中寫有荔枝果肉係搵唔到，花香味可能太低調比較容易被其他味遮蓋，呢個okay 但唔算好好飲，其他飲品都係用玻璃杯裝，唔知點解呢個用膠杯裝。 🍴橙味摩卡（￥38）呢個係朋友飲嘅，叫咗熱飲、深焙可可同脫脂奶，我試咗一啖，橙味好濃，朱古力味都好濃，但完全飲唔到咖啡味，感覺似橙味朱古力多過 mocha，我個人覺得唔好飲。 以下呢幾樣係朋友叫嘅，我冇試過～🍴早餐卡經典招牌套餐（￥49）朋友叫咗巧克力羊角加燕麥奶拿鐵，羊角即係牛角包，嚟到時個包係凍嘅，要叫店員攞去焗熱，朋友 comment 係呢度嘅牛角包冇佢響上海食咁好味，用QR code 點餐冇得寫加熱。 🍴煙肉蛋牛角呢個係後加冇記低價錢。 🍴胡蘿蔔蛋糕（¥28）朋友話好食。 🍴熱情果繽紛果汁茶BSLK（￥28）都幾大杯，朋友話有果味都有茶味。後尾去其他商場行嘅時候都有見到呢間店，知道應該都算係分店多嘅連鎖餐廳。因為係平日亦都唔算係繁忙時間，人流唔多，餐廳有室內同戶外空間，坐得幾舒服。價錢上唔算平，飲品同包都貼近香港價錢，蛋餅同 egg benedict 大概平1/3左右，整體質素正常唔算突出，朋友覺得牛角包都未有佢之前食過嘅水準，呢間（分店）應該未算太好，可能其他分店有機會做得好D。體驗感受 ⭐️⭐️⭐️🔍Baker & Spice（深圳平安金融中心），中國追蹤我的IG：tracyloveliving
