如果大家有追蹤我嘅 post，都有睇過今年1月，我被香港呢間店嘅訂位系統激到 xx 聲，真心唔想再去食。廣州滑雪旅程，只係去兩日，第二日滑雪，lunch 要留響雪場入面食，滑完雪下晝5點幾，除咗響雪場個商場食飯外，都冇咩選擇。返酒店攞咗行李後返商場，朋友好想食呢間！（其實朋友早一日已經想食，不過呢間店下晝有落場時間，最後先不幸地揀咗食朝天門）🍴老壇子酸菜魚 - 鱸魚二人份（￥128）有一個專門上酸菜魚嘅店員，佢個頭戴住一頂魚造型嘅帽，仲會大叫一堆嘢，都幾攪笑。酸菜魚好大盤，魚嘅份量多，魚肉厚身幾爽滑，仲有一個炸咗嘅魚頭，酸同辣嘅味道幾 balance，真係幾好食嘅，另外加咗金針菇（￥9），份量唔算多。香港1-2人份量係$258，北上食唔使加一係平一半有多。 🍴芥末蝦仁球（￥32）份量唔算多，蝦肉包咗粉漿炸，粉漿唔算厚，蝦肉唔算好爽口，芥末味okay，唔特別出色但唔算差。 🍴乾餾豌雜麵（￥16）本身唔知黃色脆身嘅係咩，原來係豌豆，另外有肉碎同蔥，開頭被個紅色嘅辣汁嚇親，以為會好辣（雖然我用香港角度我算食得辣），但原來唔太辣又幾香，麵本身未算煮得好彈牙，可能煮耐咗丁丁，撈埋之後食，係幾唔錯嘅～ 🍴沒骨頭的雞爪（￥28）又係紅色嘅辣汁浸住雞爪，我彷彿覺得呢個辣汁同碗麵嘅辣汁係同一個汁，不過呢個上面有好多白芝麻令到惹味好多，雞爪係有食到一粒骨，係爽口嘅，呢個都幾好食。 🍴乾蔥菌菇灼菜心（￥18）呢個唔食粒辣椒係唔辣嘅，個醬油帶少少甜味，正常發揮。 🍴蛋酥軟糍粑（￥20）糍粑炸到外脆內軟，上面有花生粉，配埋紅糖食，好味！ 外面有自助吧，有熱水，同埋可以自己整陳皮洛神花茶～ 檯面有個簽桶，上面有D 得意字眼，主要係大吉，有D 吉同埋少量係問號，都幾有趣！ 開頭我本身有D 唔情願去食嘅，試咗之後有少少改觀，係幾好食，只係如果叫我去香港嘅店食呢，就要再諗諗。不過我發現香港嘅店響 open rice 有返訂位，時間都幾合理嘅，下咗啖氣之後可能會去試吓～體驗感受 ⭐️⭐️⭐️⭐️🔍太二酸菜魚（廣州），中國追蹤我的IG：tracyloveliving
