食完上一餐唔好味嘅火鍋，天氣好返少少，叫車出去廣州市行吓，其實夜晚都唔算太肚餓，差唔多8點幾先諗食咩。朋友推介呢間，佢之前去過飲茶覺得唔錯。去到嘅時候已經相對夜唔係好多人，我被呢座建築物吸引，估唔到有咁多層同埋咁有歷史。 呢度係食中菜，本身我哋想叫佢獲得「特金獎」嘅陶陶居百年燒鵝，同埋推薦嘅錦繡海鮮紅米腸，不過可能太夜已經賣晒。🍴冰鎮咕嚕肉（￥78）根據佢點菜紙嘅資料，係選用「黃金六兩」豬頸肉，上網睇吓咩叫「黃金六兩」，原來豬頸肉本身一隻豬得兩舊，因為唔會過六兩，所以有個咁勁嘅名，其實佢只係想講佢用咗豬頸肉做咕嚕肉而已😂 佢嘅 presentation 都幾大盤，主要係冰塊，不過肉嘅份量都唔少，仲有藍莓、芒果同紅椒拌碟。一啖咬落去，炸粉唔厚，肉質嫩滑爽口，酸甜味調較得唔錯，個外皮未算好脆，響冰塊上面放多幾分鐘反而仲脆咗少少，好味！ 🍴啫啫生菜煲（￥49）又根據佢嘅點菜紙寫，佢用嘅係3斤羅馬生菜中選出1份最嫩嘅菜芯，配以生曬嘅蝦醬同大蝦乾，用200⁰C 高溫砂煲上檯現啫。嚟到嘅時候真係勁熱，店員用匙響度炒，勁香蝦醬味，等咗一陣夾咗一條菜，真係熱到辣口，蝦醬味濃郁到爆，勁想叫碗白飯（不過我哋已經叫咗炒麵，唔會食得晒）！蝦乾嘅份量都唔少，過咗幾份鐘，個煲仲係煮緊個菜，呢個都好好味！ 🍴鬼馬黃皮蝦（￥73）因為叫唔到燒鵝，但覺得如果唔係燒鵝又未必想食另一款肉，就叫個蝦試吓！蝦都幾大隻，份量唔少，下面有D 油炸鬼粒，再有D 黃皮，味道上都係酸酸甜甜，蝦嘅質素有D 係爽口彈牙，有D 就一般，呢個我覺得味道正常，唔算勁好食。 🍴豉油皇炒麵（￥39）呢個炒得幾乾身，正常發揮。 茶錢￥8一位，茶壺放響蠟燭爐上面，keep 住夠熱，環境好靚坐得好舒服，可能因為準備清潔收工，每次都要行出去先搵到人，但都可以理解嘅～ 之後睇返佢嘅網頁介紹，原來呢間店係始於光緒6年（1880），前身叫葡萄居，到1925年建成依家見到呢座建築物，即係有接近100年樓齡㗎～因為唔可以同時上載影片同相片，有興趣睇片嘅朋友，可以去返我個 IG 睇😊體驗感受 ⭐️⭐️⭐️⭐️🔍陶陶居（廣州），中國追蹤我的IG：tracyloveliving
