睇咗我上一個 post 就知道我去咗廣州室內滑雪場滑雪,因為酒店響滑雪場附近,距離廣州市中心要1個鐘車程,我同朋友去酒店放低行李已經下晝2點幾勁肚餓,就決定去滑雪場個商場 - 花都融創茂搵食!朋友揀咗呢間自稱重慶老字號嘅火鍋店食,店內環境唔錯都有丁丁特色,要掃QR code 落單,我掃極都掃唔到,原來要用微訊掃😅多謝晒,我完全變成 handicap! 🍴滋補鴛鴦鍋(¥58)鴛鴦鍋一邊係麻辣,叫咗微辣,另一邊係滋補湯,試過係有少少藥材味,麻辣湯微辣連我呢個頗食得辣嘅人都覺得算幾辣,唔食得辣嘅就唔好試啦~ 湯底正常冇咩特色~ 🍴宮廷蓋碗九宮格拼盤(¥78)呢個算係貴嘢,但係最唔掂嘅嘢,打卡係幾靚但係完全唔好食!呢個九宮格有豆腐皮卷、蝦滑、鴨血、 鮮毛肚、鵪鶉蛋、鳳爪、鴨肝、鵝腸、海帶,食晒咁多款只有蝦滑比較好,其他一下係唔使整,一下唔覺好新鮮,最後都唔覺有邊款好食,性價比低!另外攪笑位係個裝食物嘅碗,係一件過唔會有機會俾你整爛,除咗海帶嗰碗係到底之外,其他都係墊高咗嘅! 🍴高鈣羊肉卷(¥38)見到有普通羊肉卷同高鈣,我完全睇唔明咩叫高鈣羊肉,不時北上消費嘅朋友話我知,高鈣嘅意思係羊肉卷中間有一條類似軟骨嘅嘢,試咗果然口感好得意,肉質柔軟而中間會有一個位有咬口,呢個我覺得幾好食,朋友反而覺得有羶味。 🍴雪花肥牛(¥48)呢個質素都唔錯,雪花都幾靚,肉質okay 份量都唔少,相對香港食嘅性價比幾高! 🍴蝦餃(¥18)呢個幾得意,條狀造型,但食落又唔覺有咩特別~ 🍴手打玫瑰牛肉丸($38)造型非常好打卡,每粒牛丸下面有一片玫瑰花瓣,食落去就完全唔掂,粒牛丸嚡到一個點係完全唔想食落去~ 🍴茼蒿(¥15)唔算太翠綠,都算正常。 🍴凍豆腐(¥12)未完全解凍仲係有冰,味道正常。 油碟$6 一位,出面有自助調味區,仲有冰粉,食落去係室溫冇咩味,只係覺得放咗一堆啫喱狀嘅嘢入口,唔識欣賞。 整體上食物質素一般,去過滑雪嘅朋友話,佢之前都係響呢個商場搵嘢食,呢間係佢食過最差嘅,咁嘅價錢好多地方都好食過佢,雖然相對香港價錢係平好多,而且唔使加一,不過始終D 嘢一般,或者可能係冇好好管理加盟店嘅質素啦~ 不過,幾日前睇新聞,呢間店啱啱響香港蘭桂坊開咗新店,佢嘅招牌九宮格係咪拆招牌我就唔敢講,亦有話炒製技藝已被列入重慶市非遺傳統技藝之中,不過我唔識欣賞,定價仲要係$488至$1388,香港分店好唔好食就唔知啦,至少廣州呢間分店就唔多掂啦!體驗感受 ⭐️⭐️⭐️🔍朝天門火鍋(廣州),中國追蹤我的IG:tracyloveliving