用朋友行屯門市中心，朋友心思思想食韓式炸雞，搵到呢間店，因為未夠6點時間尚早，見到廚師響門面傾偈，聽到佢哋講韓文，朋友即刻話食呢間。店有一D 位響商場，朋友笑話食炸雞要落手食再舔埋手指先開心，而坐嘅位係路過都會睇到食相，都係叫外賣食得自在D！ 🍴辣椒蛋黃醬炸雞 （有骨/$185/隻）炸雞每間店都有 common 嘅常見口味，依家好多時我都會試店嘅獨有風味，今次見到呢個味就試吓！呢個味係微辣，加埋微酸帶甜嘅蛋黃醬（係肥死人但我又鍾意食😂），少少刺激又唔會太激，正！炸雞外皮脆，雞肉嫩滑，雞肉本身都有味，唔會只係個外表有味入面冇味，呢個掂呀！ 🍴炸冬粉海苔卷（$55）外皮有炸粉加埋紫菜好香口，入面煙煙韌韌，係唔錯嘅小食！ 🍴牛肉紫菜飯卷（$55）另外見到佢有好多款飯卷，諗緊食微辣烤豬肉定係牛肉好呢？諗諗吓隻雞已經辣辣哋，個飯卷都係叫唔辣，最後揀咗牛肉。韓式飯卷最好嘅地方係餸多飯比較薄，牛肉份量都唔少，鬆軟入味，配埋紅蘿蔔絲、青瓜、雞蛋，最後點綴嘅白芝麻粒都好緊要，加埋好好味～ 整體上叫咗3款嘅嘢都好好食，等緊外賣時已經見到不斷有人嚟落單，因為即叫即整，好彩早少少，等咗10分鐘鬆D 就可以攞！外賣袋係勁靚又 bling bling嘅金色袋，我同朋友都有少少驚訝，完全唔似攞住外賣袋，雖然沿路行緊嘅時候不斷嗅到炸雞味🤪 開出嚟個炸雞盒都好精緻，而且炸雞仲係熱同香脆，朋友話應該金色袋入面嘅銀色層係有保溫作用，唔係單單一個 fancy 嘅袋呢～體驗感受 ⭐️⭐️⭐️⭐️🔍K Chef Story（屯門），香港追蹤我的IG：tracyloveliving
