屋主 Danny 係朋友嘅唱歌老師,朋友去過食私房菜覺得好正,吹雞再去,仲send 咗Mill MILK 嘅 youtube 訪問俾我哋睇,我哋一行24人浩浩蕩蕩走訪呢個12000呎嘅異國空間。響梅窩碼頭散步去大概20分鐘,迎接我哋嘅係Danny 囡囡親切嘅笑容同埋藍色大閘,一行入去已經唔再覺得響香港,就好似去咗我11年前去過嘅 Santorini 咁! 先見到一個好大嘅藍白色花園,沿住梯級行上去,有戶外煮食空間、廚房、飯廳、戶外餐間、同埋兩個室內餐間,好有印度同摩洛哥風情! 🍴煙鴨胸香芒什菜沙律呢個一D 都唔普通,上面有脆脆嘅櫻花蝦仔,帶咸香味,秘製沙律汁好出色,用咗唔同嘅鮮果同醬汁做,清新又開胃。 🍴安格斯牛肉串燒牛肉又淋又入味,油脂燒溶咗包返粒牛肉,加埋燒番茄仔完全唔會有油膩感。 🍴伏特加香草烤大蝦蝦非常大隻,個蝦殼有炭烤味咸咸哋,蝦頭有膏,蝦肉好爽口帶少少伏特加味,正呀! 🍴醬燒豬仔骨豬仔骨好易咬開,醬汁好 sticky包住豬仔骨,呢個都唔係一般燒烤醬,用新鮮水果同醬料做,果糖燒到焦糖化後好好味,食到手指都要啜埋😂 🍴炭烤咸鮮馬友魚皮勁脆,因為魚肉係用鹽醃過夜,好似咸魚咁有咸香味,但肉質就好似鮮魚咁嫩滑,最最最唔可以放過嘅係魚骨,烤到脆卜卜,醬汁咸香得嚟又唔會勁咸,送啤酒一流👍同 Danny 傾偈時,知道先將魚放響炭烤爐比較高位置烘20分鐘,出咗魚油之後再續層降低燒,所以入口時會 feel 到有層魚油漿住個口,但又完全冇油膩感! 🍴柴火爐焗香草鷄 香草雞個皮好脆,雞肉入味嫩滑,柴火係用松木燒,Danny 解釋佢試過唔同嘅柴,松柴比較鬆化,柴火會溫柔D,先可以慢慢燒到外脆但入面仍然好 juicy,因為火力大嘅柴,會燒到外面燶,入面唔熟,或者會燒到太乾,所以就算松柴比較難搵到,都堅持用松柴!另外個麻辣粉都係一絕,用咗2款麻辣粉加5種香料現製,香得嚟唔會太衝擊,after taste 個咀邊有輕微跳動,好想叫佢入樽賣俾我,不過Danny 話要現製先得,放一兩日受潮就會走味~薯仔用咗雞油同鴨油整,都係勁好味,好彩每人有一粒唔使爭😂 🍴新疆孜然烤羊串呢個可以揀辣度,由唔辣到大辣,我揀咗中辣,辣得過癮之餘又唔會蓋過羊肉嘅味,風味十足! 🍴魚湯慢燉高山菜 用咗好多唔同嘅魚慢燉煮湯,加上娃娃菜,魚湯濃郁完住冇加鹽都好鮮甜! 🍴柴火爐現烤薄餅薄餅好薄,餅底有松柴香亦都好脆,後尾發現原來個柴火爐係Danny 自己切,比起一般嘅薄餅爐高身,因為對流嘅空氣會相對多,柴爐嘅溫度唔會好似一般pizza 柴爐咁高,可以烤 pizza 同埋其他肉類~ 🍴香滑南瓜西米露甜品可以揀熱或凍,西米大大粒,比起細粒更有咬口,南瓜露好滑,有少少南瓜蓉,甜度啱啱好,我仲試咗一啖熱食,南瓜味比起凍食更香! 🍴西班牙果子酒都係由 Danny 調配,用紅酒base,果香味十足,唔似飲緊酒,唔小心會好易飲多咗😳 每道菜都係 Danny 同囡囡用心製作,由太太上菜,解釋每道菜嘅內容。慢慢煮慢慢食,菜同菜之間可以同朋友傾偈,亦可以出去同Danny 傾偈,佢非常好客,好樂意解釋食物製作,又或者響屋入面唔同角落打卡影相,飯後Danny 仲彈琴俾我哋唱歌,過咗一個好開心嘅假日下午~體驗感受 ⭐️⭐️⭐️⭐️⭐️🔍梅窩私人大宅 ,香港追蹤我的IG:tracyloveliving