Lunchtime 響中環搵食彷彿選擇好多，不過要坐得舒服質素又好嘅，通常都幾貴。今次竟然係我家姐搵到呢間日式x法式餐廳，lunch menu 3 courses都係百幾蚊，仲要因為新開，依家做緊35% off，好抵食呀！ 🍴Tomato Soup番茄味好濃郁，飲到有番茄蓉，非常真材實料，配2件脆多士，好味！ 🍴Salad有士多啤梨、橙同沙律菜，沙律菜好新鮮，最出色係個 Dijon Mustard Honey Wine Sauce，令我忍唔住落咗勁多😂 🍴Ox Tongue Stew with Pasta Teppanyaki Sauce（$128）有兩款牛脷，一款係厚切，另一款係薄切，厚切牛脷煎到啱啱好，咬落去好爽口，薄切嘅用咗日式漬物嘅做法，慢煮咗2日，兩款都好好味，如果要我揀，我覺得厚切優勝丁丁！ 🍴US Flank Steak with Homemade Beef Peppercorn Sauce（$168）呢個係和牛嘅 Flank Steak，本身 Flank Steak 肉質係比較硬，但係今次食到嘅竟然冇好硬嘅口感，煎得非常媺，肉味香濃，真心想讚吓大廚嘅功力同技巧👍側邊嘅法式奶油焗薯都好好味，其實個醬汁好香，仲見到有黑椒粒，不過件和牛係好味到完全唔需要醬汁😂 🍴Pan Fried Cauliflower Steak with Mushroom Quinoa Rice, Bonito Sauce（$118）睇 MasterChef 時都會見到有參賽者煮椰菜花扒，但就未試過，今次可以親身試吓。咬落去有爽脆口感，好入味，開頭以為味道會好寡，但原來唔會。大廚一路煎緊嘅時候，有講佢先將椰菜花扒慢煮3個鐘，令到湯汁慢慢滲入去，而且保留到爽脆質感，我再見到大廚一路煎會一路加湯，應該係鰹魚湯，所以咁入味！ 牛扒同椰菜花扒係由大廚現場即煎，我走咗去吧檯位睇住大廚煮，佢非常好人仲好細心介紹。 🍴Chocolate & Mini Movenpick Vanilla Ice-Cream好精緻嘅日式 Presentation，朱古力係用咗85%比利時朱古力做，切開時好似好硬，但係原來好滑好濃郁，唔會太甜，配埋雪糕食好正！最後仲可以揀咖啡或茶，今日嘅茶係 Earl Grey，為呢個 lunch 劃上完美句號。 呢間餐廳嘅菜式係西餐嘅外表但又融入咗日式嘅煮法同味道，都幾特別，值得一試！餐廳環境舒服，價錢唔貴，食物質素同服務又夠好，係同客人食lunch 嘅好選擇～ 因為做緊35% off，最後埋單每人都係一百蚊鬆D，真係超值到一個點，要試就要10月底之前嚟啦😝體驗感受 ⭐️⭐️⭐️⭐️⭐️🔍La Saison Restaurant & Bistro（中環），香港追蹤我的IG：tracyloveliving
