好多人都講,要體驗當地嘅文化,最好係去逛市場!去到首爾最後一日,大概有半日時間,我去咗廣藏市場。雖然我知道呢個地方好遊客化,咪當去行下食下嘢囉! 🔍順熙家綠豆煎餅 ⭐️⭐️⭐️⭐️行咗一個圈,搵到網上面呢一間好多人都推介嘅綠豆煎餅 - 順熙家(其實我冇睇 running man)😅,因為招牌係寫韓文,所以對咗人哋影嘅相一陣子,確認到係呢間店! 其實廣藏市場入面有好多間都係賣即刻整綠豆餅,不過主要都係路中心嘅舖,座位好少冇冷氣,呢間店比較有規模,有兩個舖位有冷氣,行入去嘅時候,另外一邊嘅鋪位已經坐滿咗人,我坐咗響另一邊,冇咁擠迫枱檯嘅數目唔多,坐得舒服D! 🍴綠豆煎餅(₩5000)門外面有個阿珠媽不斷響度狂煎,一叫咗好快有,仲非常熱辣辣,外脆內軟幾惹味!🍴豬肉丸子煎餅(₩3000)同樣係熱辣辣,都係外皮好脆,豬肉味濃郁有咬口,同綠豆煎餅一樣咁出色!🍴 百吃不厭紫菜包飯(₩3000)嚟首爾都有諗過食紫菜包飯,到咗最後一日都未食過!本身想食一D餡料比較特別嘅紫菜包飯,不過行完成個廣藏市場都搵唔到,就喺呢度叫咗一個,呢個係簡單版嘅紫菜包飯,入面得酸瓜同埋紅蘿蔔,上面有小小芝麻,係唔錯不過冇乜特色! 我見當地人,嚟到呢間店都係食呢三樣嘢,其實呢度仲有生伴牛肉食,不過我就冇試到。 🔍101號舖⭐️⭐️🍴魚糕(₩1000)冇重點! 唔知道係咪早一晚食炸雞食到滯滯哋,唔係太肚餓,本身想喺廣藏市場食冷麵,但係一坐低就要每人食一碗,真心食唔落,所以就買咗以下兩樣嘢返酒店食埋先去機場。🔍13號舖⭐️⭐️⭐️⭐️🍴豆乳冷麵(₩8000)冷麵同埋泡菜分開咗兩個袋裝,再有一個發泡膠碗,我冇倒出嚟,因為倒出嚟更加摎挍!豆乳湯底有非常濃郁豆香味,好好飲!冷麵好彈牙,咁熱嘅天氣食到呢種冷麵好爽!點擊圖片放大 🔍22號舖⭐️⭐️⭐️⭐️🍴雜錦糯米腸(₩10000)本身我同阿珠媽講我要糯米腸(₩7000) ,跟住阿珠媽問我mix? 我就答okay!跟住發現佢放咗三款唔同嘅糯米腸,仲有一D豬腩肉、豬肝、豬腸、豬耳,到收錢嘅時候先知道,比起就咁叫糯米腸貴咗₩3000,不過對於鍾意咩都試吓嘅我嚟講都幾啱!份量都幾多,其實我都唔係好食到三款糯米腸係分別用咩做,味道上係有少少唔同,煙煙韌韌都幾好味!豬腩肉同埋其他內臟,鹵得好入味! 我覺得叫兩款外賣呢個選擇都幾啱,因為可以試到兩款唔同食物,順帶一提,叫外賣記得問佢攞筷子,因為佢係唔會主動俾你!最後我響酒店都食唔曬盒糯米腸,帶咗去機場!因為時間好趕急,就照做出境手續,竟然盒糯米腸係可以出到境,我就響上飛機之前食埋!市場入面其實仲有好多唔同種類嘅嘢食,好多人會去食生牛肉同生八爪魚,亦都有街市部分賣新鮮蔬果食物,雜貨店,賣棉被咁... 雖然... 係遊客化㗎啦,不過都可以嚟體驗吓嘅~體驗感受 ⭐️⭐️⭐️🔍廣藏市場 광장시장 Gwangjang Market,韓國首爾追蹤我的IG:tracyloveliving