呢間店係朋友去過，覺得好食介紹嘅，基本上朋友唔係睇過咩推介去，只係路過行入去食！Google map 唔會搵到間店，不過朋友有locate 到位置，我用 Naver app 就搵到！行完弘大響呢度晚餐，朋友本身推介烤貝殼，要戴手套自己烤，同老闆落單時，老闆不斷話好熱呀，叫我哋叫 steam，佢既然咁講就事旦啦～ 雖然佢有韓文同中文繁體 menu，不過要留意嘅係，中文繁體 menu 入面有d 嘢食已經冇再提供，價錢都唔 update 嘅，都係要用 Google translate 睇清楚會好D！🍴蒸貝殼 - 細（₩39,000)成盤出檯時本質上已經食得，響廚房已經蒸好，我未趕得切影相，阿珠媽已經放咗隻扇貝肉上我隻碟，一手掉埋個殼！個鍋有5款貝殼，最面係扇貝，有4隻，跟住有2隻長帶子，呢兩款我覺得係新鮮，不過可能蒸得過火咗少少，口感已經開始chewy，有丁丁浪費咗！跟住我明白點解阿珠媽咁快手放隻扇貝上碟，因為佢應該知道煮過咗，我玩完影完相先夾起，隻扇貝已經完全玩完！另外應該有花甲，同埋兩款蜆，因為我唔太識貝殼類嘅品種，冇辦法寫到正確資料。呢3款比較細隻嘅蜆就好新鮮又鮮甜，份量好多，原汁原味食好正！食完發現原來老闆叫我哋食蒸嘅真係好啱，因為同行嘅人完全唔想落手整（即係好大機會我成餐飯都好忙碌），同埋烤嘅會有芝士，會有機會蓋過咗海鮮鮮味，所以我覺得宇宙呢個安排係最好嘅！ 🍴辣炒魷魚（₩19,000）魷魚份量唔算太多，辣度對我嚟講係小辣，好惹味，魷魚好爽口！ 🍴蜆刀切麵（₩9,000）開頭只係見到麵，後尾發現下面勁多蜆，刀削麵煙韌，湯底都算鮮甜，當然同之前介紹嘅隱世店冇得比，食到有少少味精，不過都算唔錯！ 整體上個貝殼鍋係好食同抵食，只係嚟食烤 / 蒸貝殼都好夠正，店外面有好幾個裝貝殼海鮮嘅水缸，即撈即開即煮，如果去弘大又想食貝殼類海鮮，可以試吓呢間！ 體驗感受 ⭐️⭐️⭐️⭐️🔍조개이야기 홍대본점 Shellfish Iyagi Hongik Univ. Main Branch，韓國首爾追蹤我的IG：tracyloveliving
