有朋友之前去完首爾，推介我去 Hermès Cafe 試 high tea，當我知道 high tea 價錢之後真心 surprised 竟然咁平，即刻放入行程！ 位處 Dosan Park 附近，唔近地鐵站，可以選擇轉巴士或者的士 / Uber 直接去。Cafe 響一整座金黃色 Hermès 嘅B1，上面有shop 同埋辦公地方，Cafe 可以由shop 或者後面辦公電梯落去都得！ 呢度冇得訂位，朋友同埋睇過網上其他人講，去到大概等一兩張檯。唔知我係好彩定唔好彩，我計劃去嘅嗰日係下雨天，朝早仲收到好多官方緊急狀態警報，我大概4點到，當時只有兩檯客人，想坐梳化定窗邊都得～ 🍴Afternoon Tea Set for 2 (₩79,000) Tea Set 有原味同藍莓味 scone各一、3款小食、5款甜品。食物放好之後，用咗好多時間 影相影video先開始食😂 我自己覺得原味scone 比藍莓味更加好食 ，玩完一大輪仍然保持溫暖感，外脆內軟，clotted cream亦都比士多啤梨醬好食。 3款小食入面，我覺得西柚啫喱幾特別同清新，松露醬多士都唔錯。 甜品方面，5款都非常好食，Canelé 做得非常出色，外層香脆，好有焦香味，內層鬆軟濕潤，好味～ Macaron 都好好味，外脆內 chewy！另外比較特別嘅係Mango mousee cake，切開後發現中間有朱古力㗎～ Tea set 包兩杯飲品，我覺得high tea係要飲茶先 match，本身想叫 Afternoon in Paris，點知佢話 sold out 😢 後尾叫咗 Red of Africa 同埋 Apple Tea (Apple Bouquet)，整套茶具當然非常精美 ，Red of Africa 味道層次感多D，有獨特香料味，Apple Tea 就比較普通，另外再叫咗一個 Royal Milk Tea (₩15,000)，呢個係比較甜嘅奶茶，茶味好香好滑，茶具同 premium tea唔一樣。 整體上咁多款食物都好有水準，服務一流，我自己覺得環境非常舒服，基本上佢只有7張檯，檯與檯之間空間非常寬闊，我當日去直到離開都冇坐滿過，我諗如果坐滿人，大家講嘢比較大聲的話，可能會比較嘈。 無論你係咪呢個品牌嘅鐵粉，會唔會好有儀式感咁帶埋呢個品牌嘅手袋精品去潮聖，單純兩個人港幣$500 有找，就可以嘆到精緻好味嘅 high tea，感受到環境帶俾你嘅 vibe，已經真心覺得值得去試～ 體驗感受 ⭐️⭐️⭐️⭐️⭐️ 🔍Hermès Cafe Madang Seoul，韓國首爾 追蹤我的IG： www.Instagram.com/tracyloveliving
