香港人生活節奏快，成日都話要食個快飯，好多時一餐飯用15分鐘就倒晒落肚，又返去做嘢，有時一路食一路做！對我嚟講最恐怖嘅係，以前有個老闆最鍾意call lunch meeting，一路食住個飯盒一路開會，美其名話善用時間，其實係連飯break 都冇埋，根本唔知放咗咩落口，食物係咩味，只係飽咗就算，嗰時嘅我成日都胃痛！今日放假，同朋友響中上環行下hea下咁，俾街上一個黑板廣告版嘅字吸引咗「Enjoy a taste of Sweden」！其實我自己好鍾意北歐，因為生活節奏比較慢，瑞典人Fika 嘅意思就係coffee break，佢哋相信Fika 後會有更多工作動力，做嘢會更有效率，我都好希望香港嘅老闆會學懂「休息是為了走更長的路」！一於去感受一下瑞典嘅慢活Fika 時光！ 舖面係綠色撞紅色好舊香港式嘅半鐵閘，小店唔係好大，有3張檯，店內有好多同香港有關嘅掛畫，亦都有賣「香港」毛巾、蠟燭、手錶… ！店員出入coffee bar 位嘅木門仔係中式嘅「囍」字門，裝修都幾特別wor！佢個set 都幾抵，$70有一個bun + 一杯$40 飲品！ 望住個餐牌，有咖啡、朱古力、茶、smoothie，有D 大路飲品，有D唔太睇得明，店員見我黑人問號嘅樣，就細心咁詳細解釋～ 🍴Iced Conspiracy Mocka ($55）呢個真係冇店員解釋係完全唔會明！呢杯唔係「陰謀」Mocha，原來因為佢哋用嘅朱古力係由一間本地生產嘅手工朱古力店 Conspiracy Chocolate提供嘅～😂佢有唔同嘅味，我揀咗自己覺得比較特別嘅「辣」味！一啖飲落去，味道好有層次！佢哋嘅咖啡豆係瑞典製作medium roast Columbia，有輕微酸度，跟住會飲到黑朱古力嘅苦澀味，最後係有少少微辣滲出嚟，亦都帶有少少肉桂味，因為有奶加上我叫咗凍飲嘅關係，感覺唔會太辣，味道特別得嚟又好飲！我估如果叫熱飲的話會幾暖胃，冬天飲就會好正！店員之後切咗細細粒（好似綠豆咁大粒）嘅辣味朱古力我試，我放響脷度，係好純嘅dark chocolate 味，本身仲想講都唔係好辣丫，點知句嘢都未講完，就有一陣頗強勁嘅辣味出現，原來係after taste 先嚟料，條脷有朱古力嘅部分有少少麻，呢款朱古力正wor！攪到我上網搵Conspiracy Chocolate 邊度有得賣😂🍴Non-creme Latte / Hazelnut Latte ($45)呢款係朋友飲嘅，朋友揀咗oak milk，佢哋嘅Hazelnut 唔係一般咖啡店用嘅hazelnut 糖漿，係用咗瑞典嘅榛子醬，見到拉花下面有一層深啡色，朋友覺得呢種榛子味比起平常嘅糖漿更濃郁，口感都有少少唔同，好味～兩款飲品叫set 的話需要補差價。 🍴Kanelbulle / Cinnamon Bun(肉桂包)都幾大件，上面白色一粒粒嘅係椰糖，因為焗返暖暖哋，包底有少少脆，上面嘅椰糖會脆脆哋，口感好得意，中間fillings 嘅肉桂味唔太濃烈，亦帶有輕微荳蔻味，我覺得配咖啡啱啱好，唔會太甜，好味！🍴Kardemummabulle / Cardamom Bun(荳蔻包)上面黑色一粒粒嘅唔係黑椒粒，係新鮮荳蔻粒，都係帶少少脆嘅口感，呢款相比下會比肉桂包甜少少，亦都帶輕微肉桂味，我本身個人唔太鍾意食甜嘢，但出奇哋我覺得兩款包要比較的話，我覺得呢個好味D，因為好鍾意佢嘅香料味！ 🍴Chokladboll / Choclate Ball (朱古力球 $30)另外見到一粒波好得意，係朱古力球，就試埋！店員解釋呢種係adopt 咗啱香港人口味嘅，原本瑞典人食嘅係好勁甜！呢個係用烤燕麥、朱古力粉、咖啡整成，面層包咗椰絲，口感有D似堅果朱古力能量球，可能因為燕麥量都多，有咬口，朱古力味香濃，冇咩咖啡味，都唔算好甜，唔錯！ 三款食物都係由住響香港嘅瑞典人homemade！ 因為係平日下晝嘅關係，店入面都唔算好多客，店員好Friendly 又慢慢好詳細咁解釋飲品同食物，我同朋友嘆住咖啡食下包傾偈，唔經唔覺坐咗2個幾鐘🤣，真真正正咁體驗到慢活嘅感覺！我… 之後會努力工作㗎啦！🤪 好感受到呢間小店嘅用心，咖啡原材料嚟自瑞典、包點嘅製作又由瑞典人主理，亦都用本地手作朱古力，講真，連鎖咖啡店都係差唔多價錢，但用料就… 希望呢類咁有heart 嘅小店可以繼續好好生存下去！💪🏼體驗感受 ⭐️⭐️⭐️⭐️⭐️於 11.2021 體驗🔍 Tiny Island Kaffe, 上環追縱我的IG：www.Instagram.com/tracyloveliving
