今次要介紹平價豪華Villa - Vacation home perfect point villa, Da Nang, Vietnam Villa 本身係住宅,有三間套房、客廳、飯廳、廚房,最大賣點係私人泳池,6個大人完全冇問題,唔使爭廁所,好似可以多住3個小朋友,仲包早餐! 點擊圖片放大 +2 呢間民宿每日會提供免費來回的士一程去Ocean Villa 那邊的餐廳(White Caps Beach Club & Bistro)下車,餐廳附近有泳池(可使用但要自備毛巾),行出一D有個大草地和私人沙灘,私人沙灘好靚,沙好幼滑,一家大細玩玩沙好正! (Ocean villa 是貴3倍價錢的酒店管理Villa呢) 點擊圖片放大 +2 坦白講,呢間餐廳屬於又貴又唔好食可一不可再系列,我哋當中叫咗一份Grill 雞串燒直頭有怪味要退返,飲品亦好一般。雖然每日有一次免費的士嚟,我哋都係嚟咗呢邊一次。 早餐有3款餐單選擇,Continental, Vietnam和韓式,每天可以自訂早餐時間,2-3個服務人員會送到你的Villa,多士、春卷、煎餃子、煎蛋會響你個廚房即整,或者會用微波爐整返熱,響飯廳set 好先離開,呢樣嘢的確一流! 另外可以自訂清潔時間,碗碟會連同房間一齊清潔! 最重點係戶外私人泳池,雖然size 唔大,兩三下就到,不過好處係佢唔係死水,有一個裝置令水不斷流動,所以玩玩水影影相係不錯,另外一提,水深大概1.2米左右,有小朋友嘅要留意! 我相信係有好幾間Villa 屋主出租房屋,由一班人管理,所以大部分東西都是以Whatsapp 通知!佢地可以英文文字對答,態度是不錯的!你當民宿咁住既心態就好了,整體上都算乾淨,不過毛巾清潔情況一般,維修也一般;毛巾方面我自己覺得最好自備,廚房設備非常齊全,有微波爐、煮食爐、雪櫃,亦有足夠碗碟、餐具、酒杯,如要煮食,要自備調味料。 要注意嘅係,峴港所有Villa 住宿都唔響市區,機場去大概30分鐘左右,四周冇咩嘢,想話出去買少少嘢食少少嘢或者忽然想去按摩係有困難,基本上要叫車出入。 Villa 大概2千幾蚊一晚,當然相比起普通當地酒店或民宿係貴好多,但作為Villa 再包早餐係平價之選!