Day 1 高雄國際機場 --> 墾丁機場快線 (NT $398一位 / 行程大約140分鐘) (另外4人包車大約NT $2100 / 夾車 NT $400 一位) --> 墾丁 --> 民宿休息 --> 墾丁大街 墾丁大街應有盡有,成條街都係夜市 + 食肆 + 買東西 + old school 遊戲,夜市6點幾開始開檔,7點已經差唔多開晒!由墾丁國家森林遊樂區牌樓開始,一直到接近墾丁凱撒大飯店,一條路直行都已經接近20分鐘,如果行晒兩邊,又入下shop 睇睇,行行停停食下夜市小吃,都可能要兩粒鐘啦! (唔計入食肆坐低食嘢) 墾丁夜市係冇垃圾筒嘅,如果你手上有太多垃圾係可以去便利店掉咗佢,如果行得太熱,你住嘅民宿又唔係太遠,尾段可以考慮將夜市食物帶返民宿食,因為你爸媽可能已經覺得又熱又累啦~ 墾丁大街 Old School 遊戲 Day 2 墾丁東西岸8小時包車遊 船帆石、砂島、鵝鑾鼻公園 (NT$60)、台灣最南端、龍磐公園、茶山吊橋 (NT$10)、佳樂水風景區 (NT$80)、恆春鎮、貓鼻頭 (NT$30)、白砂灣、關山日落 (NT$60) 行程8小時,時間由自決定,包車NT$3000,夾車NT $700一位;另外有半天遊、夜遊等,可以搵民宿代book,或是在墾丁大街上都有好多選擇,價錢度度都差唔多,我覺得民宿嘅staff 態度好,自己又費事煩,直接搵民宿攪掂。 因為墾丁嘅公車比較疏落,亦都有一D景點係公車去唔到嘅 (尤其係平日,少咗兩架公車),所以最好係包車或者係夾車遊,行程上非常standard,有D景點要收入場費同泊車費,包車已包括泊車費,景點之間距離好近,差唔多上車已經要準備落車,除咗佳樂水 --> 恆春鎮 --> 貓鼻頭兩段路係超過10分鐘。 因為idea係想睇埋日落,所以book咗車1030 - 1830。我哋架包車係7人車,好新好乾淨,坐得好舒服,司機姐姐好cool,唔多講嘢,到景點只係簡單講下點樣行去,佢會喺邊度等我哋,不過咁都好,我有D怕好多嘢講太健談嘅司機,我唔係咩都想講想答嘅人!車上亦都有雨具,如果冇嘅都可以喺民宿借定先,最好睇下天氣報告(雖然以我睇就唔太準),我呢幾日嘅天氣都唔係太穩定,突然落場雨又突然好好天,好彩墾丁一日遊整日嘅天氣都唔錯,一滴雨都冇落! 鵝鑾鼻公園係最出名嘅景點,點都要去影下白色燈塔相!其他嘅都係要運用想像力去睇嘅石頭、沙灘咁,去到貓鼻頭已經覺得有D無聊,不過入場都係講緊NT$30就事旦啦!最後我哋去到關山,決定放棄睇日落,因為見到當日雲太厚,根本就睇唔到日落,無謂買入場票啦,見仲有時間,就行咗去隔離嘅高山巖福德宮,都可以睇到平原景色。 司機車返我哋返民宿,休息一陣,因為今日都好曬好攰,決定出去夜市買嘢返民宿食,早D休息! 鵝鑾鼻公園 佳樂水風景區 - 你要運用想像力... 呢度有一隻蟾蜍 貓鼻頭 - 請繼續運用想像力 Day 3 墾丁海邊 --> 包車出高雄 (NT$2000 / 夾車NT $400一位) --> 入住商旅 --> 城市光廊 --> 六合觀光夜市 因為爸媽唔會玩水上、水中或者高卡車呢類活動,所以食完早餐輕輕鬆鬆hea 到退房先出去海邊行下,食埋lunch 就返去拿行李包車出高雄,今日天氣唔係幾好,去咗墾丁海邊逛逛不時都落住毛毛雨,包車去高雄途中天好黑,落雨,到達商旅時好大雨。 坐咗2個鐘頭車,爸媽都有D攰,上房間休息一陣,就落咗商旅嘅餐廳飲咖啡、食雪糕 (免費UCC即磨咖啡,正!大家要留意我之後介紹,呢間商旅真係唔錯架!),再諗諗夜晚嘅行程... 雨一直落,但係冇咩理由唔出去架~~~ 就借用商旅的長雨傘出咗去,本身想行去愛河,經過睇埋玫瑰聖母聖殿主教座堂再去城市光廊,點知落住雨行嘅速度更慢,(google map 話商旅到愛河 21分鐘 / 愛河到主教座堂23分鐘 / 主教座堂到城市光廊 11分鐘),離開商旅行咗成20幾分鐘都未行到去愛河嘅一半路程,決定放棄愛河同埋主教座堂,改變路線直接去城市光廊,帶著兩老去旅行就係要預咗中途有機會要放棄某D行程... 其實係自己貪心,如果早D決定放棄愛河行程,就會一早坐捷運去中央公園逛城市光廊! 唔使行到攰又成腳濕晒先後知後覺! 之後步行去六合觀光夜市(行過墾丁大街之後... 突然覺得六合觀光夜市冇咁吸引tim),食咗少少嘢就返商旅休息啦~ 墾丁海邊 好多民宿都對住海邊架! 城市光廊 六合觀光夜市