不駕．自遊 ≠ 不嫁．自由 = 不自駕．自助遊 唔係唔想自駕遊，因為我係一個左右不分加上冇車牌嘅人，想自駕都唔得... 由於唔係有好多budget，係唔可以全程包車連埋司機，亦都唔會入住星級酒店 就係咁樣，兩姊妹帶著已有老人牌即長者咭嘅爸爸媽媽暢遊墾丁 高雄 台南，我負責行程research 因為要同兩老去旅行，唔可以到時先算或者到時再搵路，所以事前要做好多research 仲要計劃得完善充足： - 機票如果係短途都可以買廉航，長途就唔好啦~ 廉航可以計下加埋寄艙行李抵唔抵，好多時爸媽都至少有一件寄艙行李架嘛； - 住宿地方嘅交通係咪方便，如果要轉幾次車或者要行好遠就未必啱啦，睇多D網上唔同訂房website comment 同埋乾淨情況； - 點到點要搭邊種交通工具 (包括需時、價錢、班次)，上車前要話俾爸媽知道車程幾耐，睇下要唔要先去廁所； - 景點到景點之間嘅距離，如要步行需時多久 (呢個我用google map 預算，跟住要另加多1/3 至一半左右嘅時間，一來google路線係冇計要等交通燈，二來老人家會行得慢少少嘛) - 要預算有休息時間，去廁所嘅地方 (可以係食肆、商場、景點，我哋就話可以唔休息同埋忍忍忍，年老嘅爸媽唔得架!)； - 旅遊常到景點和偽文青景點一半一半啦 (呢個要睇邊種爸媽)； - 預咗有D計劃咗嘅景點會因各種情況skip咗，例如天氣唔好，太攰等； - 飲食習慣就要自行了解，每對爸媽都好唔同，因人安排； - shopping 多少都要自行了解自己爸媽鍾意與否； - 夜晚大約9點左右返到住宿地方，爸媽精力冇你咁好，你叫佢早起身就得，夜訓就難啦~； - 如非獨生，可以搵多一個兄弟姊妹一齊去，或者你嘅另一半願意的話就一齊去，多個人有商有量之餘，要搵路時都有人照顧爸媽 下個post 會分享 「不駕．自遊 ：帶著兩老去旅行 (墾丁 高雄 台南) 6天5夜行程」
