終於同復活節講再見，又要返工心中實在十萬個不願意呢><（懶人邊個養得您起？！）剛剛過去幾日假期大家都有精采節目嗎？兔比雖無外遊但同樣開心٩(๑❛ᴗ❛๑)۶ 假期第一日相約左幾位blogger好友去九龍酒店倚窗閣食復活節Lunch Buffet，大家約左好一段時間終於約到啦！ 復活節多左有復活旦同兔兔裝飾嘅甜品之外似乎無咩分別，小朋友應該最開心有復活兔出巡同收到氫氣球（借問聲大細路都可以有氣球嗎？XD） 食物水準一般，期待嘅甜品令人有點失望，不過有幾位友人相伴就夠歡欣！ 揾黎侍應哥哥幫忙合照，誰知佢勁搞笑hold住快門唔放，拍左連環7張先知道影到，睇返連環圖大家個反應超爆笑 期待下次一齊再去食好野！٩꒰๑❛▿❛ ॢ̩꒱ 又去沙田揾兔比佬順便行街街，用左上次Joy & Peace送贈嘅現金券，補少少錢敗左其中一對阿Sa穿著嘅同款鞋，鞋款下次著俾大家睇~ 之後兩日都一直落住雨，將原本同友人出去玩嘅計劃都泡湯T.T唯有響屋企休息休息（當然仲有睇文同打文^^）假期尾聲拉左難得放假嘅兔比佬去大棠荔枝山莊郊遊！哩個係原定同友人前一日嘅節目，好在天公不至咁忍心，只落左一兩場過雲雨~ 路痴嘅我地竟然響朗屏站糾纏左大半個鐘先揾到接駁巴士K66．．．꒰⁎×﹏×⁎꒱大家要去荔枝園的話記緊朗屏站B1出口往前行！因為個指示牌實在太隱閉==" 落左車都要行一段路先到目的地，沿路都係村屋同草叢，有好多兇猛嘅看門狗，入夜的話實在唔敢行 到左先會見到士多啤梨園，再行入D見到馬房，雖無明確閘口但哩度已經係收費範圍，要先俾入場費$20，會獲發一張入場貼紙貼響身上，似乎幾兒戲不過入到去工作人員真係會睇，同隻佬響入面四圍行無啦啦後面有人叫停問有冇買票．．．小姐冤枉呀！個貼紙咁細張，請問應該貼前定後左定右好呢？明顯係管理不善嘅問題，令人有點尷尬 難得有馬房開放當然要入去同馬仔say個hi！馬先生三七面又幾英^^ 哩隻自我陶醉狂咬欄柵，旁邊註明「勿近！此馬咬人」，明顯係癲馬~ 要餵下小動物或騎馬仔買套票比較划算方便，$70包入場同玩三個項目 入到黎最想同兔兔近距離接觸( •ॢ◡-ॢ)-♡ 假日咁多人黎餵佢地，仲唔肥肥白白咩？ 除左兔兔仲有羊咩咩同鴕鳥，哩隻羊咩咩可能太熱情大家都怕左唔餵佢，似乎餓左好耐呢~ 小羊咩見到野食擒青到撲起身，成隻狗仔咁 有部分小羊咩自由響園內四圍走 超多人排隊等坐牛牛車，但上面坐左咁多人牛牛睇黎拉得頗辛苦，實在於心不忍 外面場地可以騎下馬仔，當然一圈只係好短時間大概只可以影下相 其實黎荔枝山莊主要係親近一下大自然，無咩新奇刺激玩意，而主要係一家大細過黎玩，好過成日帶小朋友去冒險樂園啦~
