今日要同大家做齊一set抗氧化嘅美容套裝！ $30? 買枝靚少少嘅潤唇膏都唔得啦？ 我買一個石榴，一個檸檬，兩枝香茅，一片蘆薈。。。到底做得啲咩呢？ 1) 美容液/toner 將石榴肉挖出來，包喺紗巾裡面，然後用力搗又好打又好，將汁液隔出來備用，石榴籽保留備用。 汁液加入數滴檸檬汁。 用1/3碗蒸餾水，放入鍋裡。 對兩枝香茅，香茅拍爛，切段。放入鍋裡。 連同搾完汁用剩嘅嗰片檸檬(連皮), 一齊用細火煎煮至水滾，熄放浸泡至常溫。 香茅液跟石榴汁混合，隔渣。 就成為天然嘅美容液喇^^~平日可當爽膚水用，亦可以入面膜紙當mask使用。 石榴太有益喇！！！石榴籽多酚不但抗氧化，仲可以促使膠原蛋白再生，抗皺抗衰老都係靠佢！ 香茅控油，平衡肌膚酸鹼度，收細毛孔，加入檸檬汁仲可以軟化角質，去死皮，淨白肌膚！ 2) 磨砂膏 將石榴嘅籽核加入基底油(欖油/甘油/面部按摩油) 放入研碗，用少少耐性將佢搗成醬狀(如圖)越細越好。。。 粉紅色嘅磨砂膏真靚~~~~~(少女心？ 然後再加入少量1) 嘅美容液以及油。 放於滾水上，隔水座熱10分鐘。略略濾出過多嘅油份同汁液備用。 抗氧化成份，石榴籽比石榴汁多出好多倍，根本就係精華所在，搗爛加熱，使石榴籽嘅營養釋出，融入到油份之中。 自然冷卻後，就可以用嚟磨砂喇~去死皮同時藉著按摩將抗氧化精華推入肌膚裡面。 3) 美容液 剛剛隔出來嘅汁液，呈暗紅色。富含石榴籽精華，加入少量美容油(可以參考吓之前嘅post) 。用嚟做化妝前嘅護理，或者用喺爽膚水之後嘅滋潤程序。 4)sleeping mask 將(3) 嘅美容液，加入一片鮮蘆薈肉。 放進攪拌機打成gel狀，就能夠成為保濕滋養嘅sleeping mask, 石榴籽更能抵抗自由基嘅傷害，阻止膠原蛋白流失，適合作夜間修護，促進膠原蛋白生長。 嘻嘻嘻。。。一個石榴就能做出多款有益護膚品，一set過~係咪好抵呢？ 粉紅色，仲好靚添~~~~~
