我完全唔知道攞新鮮海帶做面膜會點。。。 會唔會中毒呢？或者皮膚變成好水潤嫩滑呢？ 依家就試，即刻試。(遲左少少報告, 真係唔好意思^^") 上回講到用新鮮海帶blend汁，取其膠質同胺基酸，維他命同礦物質。 會唔會未變靚就已經中左重金屬或者碘值過高出問題呢？ 為左先盡量中和海帶中嘅鹽分，我要用凍水加檸檬汁，先洗擦左5分鐘。 然後再將海帶用少量少量礦物水浸泡了半日，希望可以將海帶嘅水溶膠質同營養都keep喺水裡面。 嗯。。。海帶無論點洗都係有陣腥味，都幾難聞。。。 最後，就係放入攪拌機打成黏液狀，用廚房紗巾隔渣。 大功告成！ 呢個就係我嘅鮮海帶面膜，透明橄欖綠色，黏性頗高，而且無食到鹹味了，但會聞到陣海水味，真係。。。 用左1個海帶結(通常買返嚟係打成一個個結嗰種), 1蚊都唔駛，5蚊就有8個左右。 汁液已經足以厚厚嘅黏喺面上，超厚咁敷，發現吸收速度仲快過蘆薈！？ 真係超超超吸收，唔駛5分鐘，面上嘅海帶液已經所剩無幾。所以我決定總共只敷15分鐘睇睇？ 嗯。。。真係好水潤，毛孔都收細！而且嫩滑飽滿，感到皮膚飲飽水咁呀！！！ 原來用鮮海帶做面膜，真係得㗎！！！效果好得有啲誇張！ 今日嘅美容成本，真係1蚊都唔駛㗎！！！ 成功喇！
