近日想改吓髮型，到底寶寶劉海定胎毛劉海好呢？ 咪住！全部都係露額嘅款式，我擔心萬一俾人見到額頭又乾又多紋？仲有開始下陷嘅太陽穴，鬆弛嘅蘋果肌TT 如果仲要襯埋今季大熱嘅格仔衣飾嘅話。。。三十歲都變四十啦。。。 所以，都係努力做好抗衰老嘅功夫啦 尋晚煲湯用剩左個蕃茄，啱晒喇！ 蕃茄根本係美容聖物！ 修復細胞嘅維他命A 美白嘅維他命C 抗氧化嘅茄紅素 製造膠原蛋白嘅氨基酸 仲有親膚嘅礦物質。。。。 蕃茄汁係強大嘅營養水，抗皺抗氧化，一於用嚟做個面膜先。 由於水份太多，往往稀釋左營養，而且單單搾汁就太浪費，點樣提昇吸收力？ 如果屋企有焗爐，可以先將整個蕃茄用最細最細嘅溫度，慢慢烘乾，讓水份略略蒸發，記得唔好去皮住呀。。。直至蕃茄皮開始變皺同輕微縮水，就可以去皮打成汁了。 蕃茄汁需要微暖，因為維他命需要加熱至近乎人體溫度，先會容易吸收。當然高過80度就會殺死維他命，留意返囉~ 如果無焗爐點好？同樣同隔水加熱嘅方法，令蕃茄加熱至微暖，軟身，就可以去皮打汁喇~ 鐘意嘅話，可以加入蜂蜜或奶粉，杏仁粉，用嚟增加稠度同黏附性。 非常之簡易有效，敷完15分鐘後，你會發現塊面好似飲飽水一樣，充滿彈性同白滑，尤其係平日比較難打理嘅額頭部份，都明顯亮白！ 用唔晒，仲可以放入雪櫃保存多一星期添，記得用之前要翻熱至微暖呀~ 今日嘅美容成本，係零^3^
