Diy護膚品，，，真係好得過買返嚟嘅護膚品嗎？ 我可以好肯定咁講：唔一定！只係，DIY護膚品我地可以增加用量(完全唔駛慳住用) 同按摩手法，以及配方，達至一定效果！ 當然，如果DIY就已經夠營養夠方便吸收嘅話，各大生產商就唔會每年千萬千萬億咁投資嚟研究同開發。一定有佢專門嘅地方啦~ 不過利申：貝爾已經全部護膚品都係自製嘅。 咁點解仲要自己整護膚品呢？買咪仲好？真係慳錢定太得閒？ 我會話DIY,係一種生活樂趣。。。 1.我可以隨我需要同就手，揀啱用嘅材料，從來唔擔心幾百蚊買返嚟完全唔啱用。 2.自己做嘅，有咩成份就最清楚，用咩方法嚟提煉都可以由我決定，無錯，浸油又好或者用水煎都好，都係根據材料嘅特性。 3.我地平日食嘢，都講求均衝營養，皮膚點解唔駛呢？用現成嘅，通常一用就係一兩個月嘅事，而DIY嘅，就係大約每星期做一次，，每次可以嘗試唔同成份，仲一定新鮮，無防腐劑，而且仲可以按需要調整配方。 4.平均200蚊一件護膚品，可能用到兩個月左右。但係200蚊，就夠我做四五件護膚品(洗面膏，爽膚水，面霜，sleeping mask, 面膜軟模。。。) 而且一樣可以做足一個月。你說呢？ 5.DIY本來就係好好玩嘅事，生活小手工，肌膚大冒險XD生活已經夠枯燥，自己整護膚品送俾自己，都係一種生活樂趣，根本就係！ 所以，我真係好願意嘗試唔同材料，，，做唔同功效嘅美容產品。。。 仲可以同大家分享我嘅成功同失敗，其實如果你問最滋潤嘅配方。。。我仍然會話，就係最基本步嘅牛奶雞蛋蜜糖^3^
