今次會為大家介紹控油型嘅DIY配方，油性皮膚，通常都帶有敏感肌？其實未必~ 因為我地喺努力將面油洗走嘅同時，鹼性含量過多，洗潔過於頻繁，就會削弱皮膚表層嘅天然免疫能力，引發敏感肌。 要控油同時滋潤兼防感染，就用香茅同檸檬葉啦~ 而且就用喺洗完面之後嘅第一道防線~~~爽膚水！ 好易整㗎咋~ 首先，準備一樽礦泉水，先落半樽，用嚟浸泡拍散嘅香茅同撕細嘅檸檬葉。份量係200ml水對3條香茅4片檸檬葉。 如果無敏感肌，仲可以加入一細角嘅青檸，連皮切粒放埋喺裡面。 浸泡過程中，同時用最細火加熱，浸煮至水滾，然後蓋好熄火，等佢自然冷卻，然後隨量加入餘下嘅礦泉水。 完成喇！鑑於好多油性皮膚嘅Sis, 用完爽膚水後，都唔敢再搽面霜，我會建議喺爽膚水裡面再加幾滴百里香油(做法可以睇返之前嘅日誌有介紹), 加強滋潤同代謝。 香茅，控油，滋潤，止痕，抗菌，防止感染造成嘅暗瘡。 檸檬葉，控油，滋潤，去水腫，增強皮膚免疫力，促進新陳代謝，防止油性帶嚟嘅粗糙，疏通毛孔。 今日嘅美容成本，係10蚊都唔駛㗎~
