2013 重遊塔斯曼 ♣ 路線 + 遊記Index 2013 Sep 匯率: 1 AUD = ~7.3 HKD Hobart周邊 Salamanca 的露天市集 去唔去Salamanca Market都係十五十六，因為覺得冚世界的市集都差不多，而且做得個朵咁響，賣嘅嘢都唔慌會係local價。不過都係去啦，無損失嘅。Salamanca Market位於首都Hobart的市中心，事前見到網頁提議話可以享指定car park泊低㗎車，再免費轉搭接駁巴士去market。就咁話啦，唔洗煩，驚人山人海難泊車。Shuttle Bus頻密，10分鐘內都有車，但只係坐到十多人。不過唔知係天氣唔好，還是淡季，市集附近無想像中多人，要泊車其實都唔係太難。 之前睇地圖以為個市集超大，但實際上係大嘅，但唔係真係大得咁誇張。檔攤有本地品（例如蔬果、朱古力、芝士、花卉、蜂蜜咁），熟食（熱狗、take away food、雪糕咁），設計類（自家設計的衫褲、帽、賀卡、裝飾咁），現成類（太陽眼鏡、舊書、雜貨咁）。其實我哋都唔係特別鍾意買嘢，尤其是裝飾擺設，加上對於買手信有啲障礙，所以都無預會買到啲咩特色嘢。都係志在感受吓，食吓嘢就算。結果，都係食（會享Tasmania食咩篇到講），同買咗少少手信：包括一桶leatherwood蜜糖，兩小瓶mustard，和當晚晚餐的餸菜。Leatherwood係Tasmania獨有的蜂蜜，比一般的蜜糖貴少少。我哋幫襯嗰檔有好幾隻味，老闆娘逐隻比我哋試。最後都係覺得Leatherwood的味道獨特啲，就買比屋企人做手信。 見好多華人享蜜糖檔、薰衣草檔到大手掃貨買手信。如果各下鍾意買嘢，又有需要密集式買手信，哩度都係一個唔錯的地方。旁邊建築內有不少gallery或者小店售賣自家設計的貨品，比市集更好行啊。 免費shuttle。小巴平日是用來接載有病的小朋友，設有錢箱籌款。大家坐完免費車，不妨放低少少捐款吖。 最右圖一塊塊係Fruit leather，但其實點解有生果唔食，要食哩款嘢。。。 食嘢另開一篇，唔特別講美食住嘞；不過路過哩檔熱狗，掛埋本新假期報導賣晒廣告，證明幾多香港人嚟行。 其實嗰日又好天又落雨（仲好密添），唔係行得好爽，到此一遊咁話啦。 翻兜指數： 資料： 入場費：免費 Salamanca Market (Map) Hobart Hopper Shuttle Bus 部份檔攤下午一點多就收（市集officially開到三點），有買趁早。 Bonorong 的動物庇蔭中心 來到Tasmania（又或者係澳洲），無理由唔去睇動物，尤其是一啲澳洲特有的動物。Bonorong Wildlife Sanctuary唔係動物園（即係搵啲動物返嚟純粹困住佢哋），而係協助和救護一啲有需要的動物，比佢哋有暫住的地方，直至可以回歸自然的一個庇護所。有部份動物已經唔再適合回歸大自然的話，就會繼續住享度。 地點位於Hobart以北，大概半小時車程。場內有好多澳洲特有的動物，而且有啲已經係剩返塔曼尼亞先有，要極力保護避免絕種。最為人所知的，當然係Tasmania Devil，佢哋雖然看似凶猛，但亦面臨數量減少的命運。其他物種仲有鳥類、袋熊、袋鼠、樹熊、唔識嘅其他袋類小動物。入場付款之時，每人會有一包餵袋鼠的食物，比大家自由餵食。 除咗入場自由參觀，每日有兩節導賞：11:30和14:00。導賞員會介紹Wombat，Tasmania Devil和Koala的生活習慣和面對的問題，大家亦有機會摸吓wombat和樹熊，好得意㗎！Tasmania Devil就唔好摸啦，手都食埋你吖！ 門口咁大個招牌，小蟲都係發雞盲過咗龍要兜返轉頭。。。 雖然Devil，wombat同樹熊係主角，但仲有好多其他動物㗎，幾靚～ 右邊有點點紋嗰隻係Eastern Quoll。 整個園區得一條路，兜個大圈，唔洗認路。 導遊哥出場，連埋可愛wombat一隻，超純良。 佢享樹暫住，係因為亞媽比車撞死咗，要靠哩度帶大佢然後放生。 你見佢純純鈍鈍，被人蝦之時會點保護自己呢？原來受襲擊之時，會盡快躲入洞中，然後屁股向出。因為佢的臀部特別厚淨受得起撞擊，而且個pat pat tup住個洞圓碌碌，敵人無地方埋手可以捉到佢。 跟住就係唔多善良的Tasmania Devil，一見導遊哥拎住個桶，就係咁抓。 餵咩食？嗰啲係雞仔嚟㗎。無陰功。。。 睇動物的鼻就知道係素食定肉食。如果個鼻濕濕哋嘅，就係食肉。你睇下wombat個鼻，係乾㗎。Devil雖然生性比較凶狠，但多數獨自活動。而且有種面部腫瘤病毒，嚴重影響緊佢哋的存活率。 到最後，老佛爺出場！！ 逃走中的樹熊。長期休息狀態的佢，哩一刻係活動得最多的時候。 Guided tour完咗之後，我哋就去餵袋鼠。正確嚟講，係蟲老公餵。 地方好大呀呀呀呀～～ 揾到一隻有袋BB嘅袋鼠。蟲老公餵得好過癮，小蟲就有啲驚，隻隻人咁高，全程距離啲袋鼠一個身位，負責影相就算。 白色嗰隻係Wallaby，係獨立困開，無得餵㗎。 地方幾優美～唔好以為右邊嗰啲係籠嚟，其實唔係封實㗎。 隻袋鼠正即回歸大自然的適應期，佢可以自出自入，出去玩完如果揾唔到食，就可以返嚟食同瞓。幾好～ 翻兜指數： 資料： http://www.bonorong.com.au/ 入場費：$25 Adult 連餵袋鼠食物一包 公園入口係有道半腰高的木門，要自己開門入去㗎，記得出入鎖返好道門，防止有動物走甩。 MONA 的藝術氣息 一開始都想去MONA，但如果真係唔夠時間，就唯有放棄。不過去Bonorong無想像中用咁多時間，有半日剩就去埋MONA。小蟲唔識藝術，不過對現代藝術比較有興趣，覺得設計天馬行空，唔明都有視覺衝擊。MONA其實係Museum of Old and New Art的短名，即係有舊有新。去到已經兩點幾，食個晏，三點幾先開始行到五點人家收工。入場費連同ipod audio guide，去到邊自動會搜索最近的藝術品資料。亦可以記錄你睇過的資料，再電郵返比自己。 大門入口享地面，展覽館在地底有三層。由地庫最底一層開始行，時間上可以比少少指引：我哋用咗兩個鐘，第一層行完及九成展品有睇資料；第二層行得一半，大部份都無睇資料。第三層未行到人哋就收工，望都無機會望。所以如果有興趣藝術的朋友，可以預多啲時間，中間仲可以享cafe食個晏、真係歎～ 順帶一講係哩度的服務好到無朋友，話說我哋落到地底B3嗰層入場，點知原來人哋個cloak room享地面。不過入場嘅職員超好，免我哋上上落落，即用對講機召個同事落嚟，帶個吊牌比我哋，兼運埋蟲老公個背囊去cloak room，唔洗我哋走一轉～話晒都三層樓吖，雖然有lift。。。 博物館大門，呢～近左邊閃閃令嗰個就係啦。 入口係地面，博物館向下底走。 有好多睇唔明的藝術品 除咗睇，仲有得玩。無錯，彈床、乒乓波、同睇電視，都係藝術嚟。 哼！不過哩張乒乓波枱，你打到多過兩球先講啦。小蟲覺得，執波先係一種藝術。 成個環境真係一流！ 館內館外同樣出色，享草地放咗好多豆袋同矮凳比人嘆。不過我哋攤攤吓，有隻孔雀喪走過嚟，仲有鴨鴨。 就連個停車場都藝術過人。。。 翻兜指數： 資料： http://www.mona.net.au/ 入場費：$20 Adult 連Audio guide 2013 重遊塔斯曼 ♣ 路線 + 遊記Index 更多照片或資料：Facebook Album
