實用資料：內文有租車公司列表供參考之用。 本來有得三個人，由Milan租車踩落去Tuscany，計返條數其實分分鐘比搭公交便宜。不過成個trip只有小蟲做司機，加上部份小鎮亦有公車接駁，所以安全和懶惰起見，選擇玩完San Gimignano和Siena才開始租車。 Tuscany內不少城鎮為了保護歷史建築，會限制只准持有特別牌照的車輛駛入城。所以在Siena的租車公司，一般都在城門之外。離開在城內的hostel，拉著行李，好歹也不會步行去2-3km外的租車公司；當然就拜託的士哥哥啦，盛惠€10.25。 2011秋意狂嚐 EATaly ♣ 速查目錄 眾多的租車公司當中，何解揀Avis？嚴格來說，小蟲是光顧一間叫economybookings.com的中介公司。（留意，無"s"的是另一間公司）Quotation只會說明價錢、車種型號和城市，到落實之後才會發電郵pickup voucher通知租車公司的詳細資料。 約了下午三時pickup，內裡相當清閒；相反，朝早人頭湧湧，無論租車還車都人多。過程也是例牌的檢查駕駛執照，比錢，check車等。原本租架VW Golf，貪細細架易handle；不過去到，亞叔話有架好嘢，是Opel Astra。眼見比預計都大架頗多，不過用同樣價錢，放行李和坐位都闊落咁多，無理由拒絕啫。 亞叔好詳細講解，連GPS都有幾部不同牌子供選擇。見用開Garmin的GPS錶，就揀返佢（雖然無乜直接關係）。 之於保險方面，諗都唔洗諗，一定買full coverage零墊底。不竟人在異鄉，是自己不小心，還是人家發雞盲也好，少些麻煩就最好啦。雖然次次都無事，但哩家嘢好邪門，買少一次分分鐘就出事；所以唔敢唔買足。而咁「好彩」，真係出事。 先分享一下在Tuscany自駕的經驗或者觀察： 在Tuscany自駕，基本上，說得上是容易的。 入小鎮，正如之前講，要留意是否容許所有車輛進入，還是要有特別牌照。比人罰錢或拖車就麻煩啦。 一般路面只有兩線雙程行車，但大部份時間都沒有其他汽車。 不過路曲多彎，小蟲怕死還是小心為上。如果後面有車，無論貼屁股貼得有多近都懶理。反正入直路，他們會自動爬頭。最緊要是刻意拖慢，等他們先過。他們亦習慣輕輕響一下honk，或者閃閃高燈，並無惡意的。 入夜後就要更加小心，因為無街燈而且多彎，根本看不到前路。如果咁橋對面有車迎面由彎位駛出，支車頭燈撐一撐眼就更加難睇。其中有一晚還要下雨，路面反晒光，玩完一日有啲攰睇得更加辛苦。 另外，如果諗住可以隨時在馬路上泊低架車去影靚相的話，抱歉，未必如你所願。大部份舖好的馬路，兩線旁邊的位置並不足以泊車。當你見到個靚景，到揾到位停車，可能都講緊頗遠的距離，個景都不再一樣；除非途中有私家路或分支小路，否則都幾難話停就停。 泊車方面，個人傾向泊在小鎮外面的入錶停車場。雖然多行幾步，但可以避免「人多路窄揾位泊」的窘局；尤其是自問泊車技術未能駕馭古鎮特窄的通道。費用方面好像是幾毫子歐元一小時。 順度提一句，在這區遊覽少不免會去酒莊試酒，或用餐時飲酒。聽本地人說，那裡一樣有醉駕條例，所以最好揾個飲得少（完全唔飲就難啲）的來當司機，切勿以身試法啦。 說回保險，事發經過非常簡單。最後一晚入夜回酒莊住宿，錯過了入口，剎車，倒車再右轉入酒莊。太黑看不見入口地下有個躉，一扭呔轉右就揩咗埋去。蟲大姐見到，但叫唔切。結果就搞成咁。。。 自問一向信譽良好愛惜用品，朋友挺放心借物件給小蟲。雖然是租車而且買足保險，但並不代表可以隨意整花弄壞，所以揩親架車都有少少唔開心。加上第二朝一早還車，感覺有點衰收尾。 不過意外就是意外，只能說幸好買了保險吧。到朝早還車，租車公司逼滿人，都等了一陣亞叔才有時間check車。發覺架車有損毀，雖然無出聲，但睇表情大概知道此車一定要入廠整，不能立時再出租了。 跟手做paper work，需要在一份表格上形容案發的經過，其他由職員填上。因為保險包足，所以只需付上€卅幾蚊admin fee就完事。我們無特別問亞叔，不過後來知道這趟損傷，需要€3000+修理費！！若買少了保險真是痛到入肉～ 之於我們怎樣知道要€3000+？這是下一個故事了。。。 以下是這趟旅程quote過的租車公司，不過大家記得上網查清商譽。 alamo argus auto europe avis Budget carhire3000 easyterra europcar expedia fastcarhire Hertz holidayautos http://www.economybookings.com/ maggiore National nova rent a car orbitz Rentalcars sixt Thrify www.kemwel.com www.osautonoleggio.com 2011秋意狂嚐 EATaly ♣ 速查目錄
