曾幾何時，食店興起$1優惠，不過後來越黎越多餐廳以$1優惠招客加上部份餐廳附帶好多隱藏收費，$1優惠嘅吸引力已經大大降低，所以近年都冇乜見餐廳有$1優惠，聽朋友介紹先知原來Orange Elephant都有$1優惠，每日嘅$1菜式都唔同，每枱限叫一碟$1菜式，冇最低消費或其他隱藏收費，其中最抵一定要數星期一嘅$1泰式明爐烏頭魚，原價要$169，所以我都揀左個星期一黎試下。 真係咪睇少$1優惠，我六點幾黎到已經有幾枱客，七點已經差唔多坐滿，所以真係最好盡早黎到。 特選椰青($42) - 椰青夠凍，味道清甜最啱配泰菜哩類濃味菜式，椰肉唔會太硬好易挖。 芒果冰特飲($36) - 沙冰打得幼滑唔會飲倒碎凍，飲落唔會太甜，非常透心涼。 泰式明爐烏頭魚($1優惠) - 雖然係$1優惠，但明爐烏頭魚係正常size冇將價就貨，烏頭魚上面有好多秀珍菇同椰菜，非常足料。 咖哩海鮮脆包盅($148) - 麵包入面有青口、蝦同魷魚，上面淋滿咖哩汁，咖哩汁加左蛋，香濃得黎唔會太杰身，麵包因為咖哩汁影響左脆度，不過口感都鬆軟，配咖哩一流。 焗大蝦粉絲煲($159) - 粉絲煲份量都幾多，足夠三四個人食，粉絲夠鬆唔會痴埋一舊，入面有兩隻大蝦，好大隻。 點擊圖片放大 最後俾大家參考返唔同日子嘅$1優惠 總結，$1優惠堅係抵，其他菜式正常價錢唔會特別貴，冇最低消費或其他隱藏收費，係抵食嘅！ 味道: 4/5 環境: 3/5 服務: 3/5 衛生: 3/5 抵食: 4/5 食店: Orange Elephant Thai Restaurant 地址: 啟德道31-33號地舖 電話: 27181088 人均消費: $150-250
