Day 2: 巴塞: 桂爾公園>文森之家>聖約瑟市場>聖十字保羅醫院>聖家堂 由於巴塞o既景點都比較集中, 景點與景點之間可能只相隔20-30mins路程, 行路同搭車都差唔多時間, 今日我地走訪左5個景點, 平均都要行1x公里, 最後為左慳時間, 夜晚我地就搭通宵巴士去馬德里 一早6:20am起身, 7am就出門, 因為我地第一個景點唔近地鐵站, 所以我地就搭巴士, 車費€2.2/人 7:10am就到左我地第一個景點, 桂爾公園 桂爾公園 Parc Guell 建議停留時間: 1hr 票價: €8.5，網上預先買票€7, 8:00am前入付費區免門票 桂爾公園入場費原本要€7, 但只要8am前入到去付費區, 就可以唔洗買入場費, 為左慳錢, 亦為左避開人潮, 我地當然一早黎到 公園有分正門同後門, 我地o既落車站近住後門, 就o係哩度行入去公園 桂爾公園唔算細, 但只有青色o既地方先係付費區, 景點都集中o係哩度 圍欄內就係付費區 桂爾公園都係鬼才建築師高第o既作品之一, 已經有超過100年歷史, 仲納入左做世遺 有錢佬桂爾先生原本想o係度起一個大型社區, 但最後起左兩座樓就因為冇買家同資金問題而停止,最後先會變左左做而家o既桂爾公園 露台o既波浪形石凳係高弟學生o既作品, 彩色馬賽加同流線形設計, 完全係高弟o既風格 唔好以為冇乜人8am前黎到, 其實露台已經好多人, 我都要避開d人黎影 公園正門兩邊哩2座咁靚o既建議其實原本只係門房小屋同搬運工人o既住所, 真係難以想像呀 點擊圖片放大 +2 o係露台影夠, 我地就經過哩條石製長廊落返去地下o既中央廣場 點擊圖片放大 露台下面哩度係Hypostyle Room, 由86條大石柱構成, 靈感黎自古希臘建築o既多利亞柱式 點擊圖片放大 行出Hypostyle Room就係中央廣場, 落到黎已經8點幾, 所以遊客都越黎越多 點擊圖片放大 +4 哩間小屋而家係一個小型博物館, 要排隊先入倒去 o係博物館望返落中央廣場 而另一邊哩間小屋就係賣紀念品o既 8:50am我地已經行完桂爾公園, 公園正門就有巴士站 我地就搭哩架巴士落返山去食早餐先 早餐當然又要食西班牙油條 點擊圖片放大 +2 西班牙油條. €4 哩度o既油條都係好鬆脆, 又係有大大杯朱古力醬俾你點 但哩度除左原味油條, 仲有朱古力油條tim, €1.26/2條 街上隨拍, 西班牙除左景點外, 其他建築都一樣咁靚 點擊圖片放大 文森之家 Casa Vicens 建議停留時間: 1hr 開放時間：10:00-20:00 票價: €16，逢星期一10:00-17:40門票€10 10:04am就黎到我地第2個景點, 文森之家 哩座建築係高第第一座重要作品, 一直以黎都係私人產業冇對外開放, 到2017年11月開始先正式對外開放, 我地都算黎得著時 文森之家門票€10, 同樣都係要預早網上買票 佢係高弟幫有錢佬文森設計o既夏季別墅, 2005年就已經列入左世遺 文森之家係一座新摩爾式建築風格o既作品, 佢仲加入左伊斯蘭, 東方元素同西班牙風格, 高弟最拿手就係將唔同o既風格融合同融入o既唔同o既建築材料之中 點擊圖片放大 +4 文森之家雖然o係市中心內, 但4層樓面加埋都有過萬平方米 為左配合夏季別墅o既主題, 文森之家無論係天花板, 壁爐定牆面, 都加左好多植物元素 點擊圖片放大 +4 而哩個吸煙室就用左好多彩繪玻璃, 帶d伊斯蘭風格 即使係廁所o既牆面都唔馬虎, 鋪滿晒花磚 點擊圖片放大 +4 大部份景點都有語音導賞可以聽, 不過都係英文都唔會聽得明, 所以我都冇聽, 最後我都係行左大半個鐘就睇完了 行完文森之家, 我地就搭地鐵去聖約瑟市場, 車費€2.2/人 聖約瑟市場 Mercado de La Boqueria 建議停留時間: 0.5-1hr (視乎食幾多野) 開放時間：8:00-20:30, 星期日休息 聖約瑟市場就近住最多扒手o既蘭布拉大道, 所以每日都有好多遊客黎 哩個市場已經有幾百年歷史, 經過幾次改建之後, 而家已經成為一個非常有規模o既觀光市集 點擊圖片放大 哩度有幾間檔賣果汁o既, 最後我地幫趁左哩檔 每款都係€1/杯, 揀左哩杯雜莓 同哩杯綜合水果, 哩度d果汁都好真材實料, 飲到生果纖維 點擊圖片放大 +4 哩度無論係生果, 果汁, 朱古力, 雪糕雪條, tapas, 海鮮, 火腿都可以食得到, 如果鍾意掃街o既, 絕對可以當一餐 點擊圖片放大 +9 生果杯€2 點擊圖片放大 +9 街上隨拍 西班牙除左火腿出名之外, 鳥結糖其實都出名, 哩度就係其中一間名氣小店 哩度o既鳥結糖係一大塊咁買, 塊塊都成本書咁大 點擊圖片放大 o係聖約瑟市場我地只係求其食左少少野, 12:10pm我地就黎到哩間食墨西哥卷o既小店 點擊圖片放大 +2 哩度o既墨西哥卷係即叫即造, 連餅皮都真係即造 ham & cheese墨西哥卷, €3.5大大個, 都幾好食 食完我地就搭巴士去下一個景點, 聖十字保羅醫院, €2.2 街上隨拍 聖保羅醫院 Hospital de La Santa Creu i Sant Pau 預計停留時間: 1.5hr 開放時間：星期一至六9:30-18:30, 星期日及假期9:30-14:30 票價：成人€14 終於見倒聖十字保羅醫院, 我地沿住外圍慢行去正門 點擊圖片放大 好難想像醫院都可以咁靚吧?! 聖十字保羅醫院前身係六間唔同o既醫院, 由於財政困難, o係15世紀時當時o既教皇就將佢地合併為聖十字醫院, 原本o既設計係將兩層高o既建築排成口字形, 圍住中間o既中央花園, 後來因為醫療需求增加, 空間同設備都唔夠用, 而有錢佬保羅o既遺囑又咁o岩係想起一間設計新穎o既醫院, 所以最後醫院o既董事會就搵左西班牙一位有名建築師, 多明尼克同保羅o既仔重新設計哩間醫院, 最後為左紀念保羅o既捐贈, 醫院個名都加埋保羅兩個字, 而去到2009年, 醫療需求因為太大加上建築破舊, 醫療業務搬左去新醫院後, 聖十字保羅醫院先正式開放俾公眾參觀 點擊圖片放大 +4 哩個門口入去就係收費區, 聖十字保羅醫院門票€14, 都係要預先網上購票 點擊圖片放大 +2 醫院模型 唔單止外觀, 醫院入面o既牆面同天花都一樣咁靚, 住o係哩度o既病人對眼都真係幾忙呀 點擊圖片放大 +23 聖十字保羅醫院同聖家堂非常之近, 未去聖家堂之前我地就去左附近哩間店食d野先 哩度係出名食餡餅o既 點擊圖片放大 叫左一個試下, €2.1 食完餡餅, 我地就黎哩間西班牙火腿店, 但黎到時竟然閂左門, 好彩隔離鋪話佢晏d就會開門 反正未夠鐘去聖家堂, 我地就等埋佢開門, 結都等左半個鐘先開門 入面有好多同價位o既火腿同芝士賣 火腿每包100g, 由每包最平€3到€2x都有 點擊圖片放大 +3 唔同價位o既火腿都買左d, 最後竟然都買左百幾€ 聖家堂Basilica de la Sagrada Familia 預計停留時間: 1-1.5hr 開放時間：9:00-20:00 票價：成人€14 聖家堂o既門票有分自由參觀門票同導賞門票, 如果唔想跟導賞行, 每日就只有17:00至19:15開放自由參觀, 我地就買左17:15 o既門票, 黎到時門口超多人 門票€14/人 聖家堂係西班牙最出名o既景點, 每一日都有超多遊客黎參觀, 所以入口都有安檢 聖家堂係一座天主教教堂, 原名係神聖家族贖罪大教堂, 即係指耶穌, 瑪利亞同約瑟一家, 因為佢係一座贖罪教堂, 所以資金來源完全係靠個人捐款, 而捐款o既數目亦會影響完工進度, 所以雖然由1882年已經開始興建, 但到而家都仲未起完, 即使係咁, 佢已經列入左世遺 聖家堂o既外觀分左三個唔同立面, 分別係誕生立面, 受難立面同光榮立面, 每一面o既雕像都唔同, 造工非常精細 點擊圖片放大 +4 誕生立面係慶祝耶穌降臨 東方三賢士 點擊圖片放大 牧羊人 點擊圖片放大 +2 高弟係教堂o既第二任建築師, 佢o係度就花左43年時間, 幾乎花盡畢生心力 東面o既玻璃以藍綠為主調, 代表日出東方 點擊圖片放大 +2 教堂中殿以森林做主題, 一條條大石柱就好似森林入面o既參天大樹, 而陽光就o係檮葉之間曬落黎 點擊圖片放大 +3 西面o既玻璃就以橙黃色做主調, 代表日落 點擊圖片放大 +8 出口o既雕像神情哀傷, 正正就係受難立面 點擊圖片放大 猶達斯之吻, 左邊o既數字表無論橫直加埋都係33, 就係耶穌愛難o既年紀 點擊圖片放大 +19 睇完聖家堂我地就黎左哩間蛋糕店 點擊圖片放大 +2 檸檬批, €4, 估唔到檸檬味好清新, 好好食 餡餅€2.2 因為今晚我地會搭通宵巴士去馬德里, 趁有時間就去超市逛下睇下有咩乾糧買 麵包超平同都幾吸引 點擊圖片放大 +2 仲以為歐州d野飲好貴, 原來都好平, 只係因為同酒o既價錢唔差得遠, 所以通常d遊客黎都係飲酒多 哩款玉泉飲品冇見過 點擊圖片放大 本地牌子o既day cream都好平, 我都買左1,2樽試下 €1-2大大枝酒, 真係平到你唔信 點擊圖片放大 本土牌子o既薯片又係超平, 超大包, 買過黎食都ok的 黑色包裝o既lay尸幾特別, 買左包黎試, 係原味冇乜特別, 口感仲比平時硬身 d凍肉都好平, 質素仲好過佳寶好多 哩度o既火腿就集中o係平價貨色, 同款黎講其實同火腿專門店差唔多, 不過牌子唔同, 平平地都可以試下 返hostel途中行過, mango雖然係西班牙牌子, 但價錢都唔見得特別平, 睇過就算 返hostel執埋行李, 順便影埋今日o既戰利品 hostel每晚9:30pm都有免費晚餐, 西班牙炒飯賣相都唔差, 試左少少味道都ok 由hostel大約行10mins就到Barcelona Estacion Nord站, o係哩度就有長途巴士搭去馬德里 我地預訂左22:15 o既巴士, 22:00黎到o岩o岩好 由巴塞去馬德里可以搭火車, 飛機或巴士, 3者所用o既時間其實差唔多, 火車最舒服亦最貴, 如果搭特快火車, 時間可以快過飛機(因為搭飛機要預早check in), 飛機雖然平過火車, 但麻煩在要預早去機場又遠離市區, 巴士最平又有得揀坐通宵巴士, o岩晒我地哩d窮遊人士 話平話平, 其寅都要€35.86/人 由巴塞去馬德里車程約7hrs, 對於去慣強國坐慣長途車o既我黎講唔算辛苦, 因為座位都比強國大巴舒服(但就冇韓國長途巴士舒服), 而且估唔到巴士入面仲有wifi同有電視睇, 同強國同韓國一樣, 每隔幾個鐘都會o係休息區停車, 旅客可以落車鬆下或者去廁所或買d野食咁
